Bangor yn ennill, Prestatyn yn colli

Uwchgynghrair Cymru Image copyright Not Specified

Daeth rhediad siomedig Bangor o naw gêm heb ennill i ben gyda buddugoliaeth yng Nghaerfyrddin brynhawn Sadwrn.

Les Davies gafodd unig gôl y gêm wedi dim ond 11 munud i sicrhau'r fuddugoliaeth, ond tybed a yw'r triphwynt wedi dod yn rhy hwyr i wneud gwahaniaeth i dymor Bangor.

Mae Prestatyn wedi bod yn dda ar eu tomen eu hunain y tymor hwn, ond siom gafodd y ffyddloniaid yng Ngerddi Bastion ddydd Sadwrn wrth i'r ymwelwyr o Bort Talbot ennill.

Gôl gynnar gafwyd yma hefyd wrth i Chad Bond sgorio i'r ymwelwyr wedi dim ond naw munud.

Yn hanner isa'r tabl roedd buddugoliaethau i'r Bala oddi cartref yn erbyn Lido Afan, ac i Gei Connah ar daith yn Llanelli.

Ar brynhawn anarferol iawn, llwyddodd yr un o'r timau cartref yn y gemau ddechreuodd yn gynnar i ennill wrth i Aberystwyth gipio pwynt mewn gêm ddi-sgôr yn Y Drenewydd.

A pharhau wnaeth y drefn honno yn y gêm hwyr gyda'r Seintiau Newydd yn ymweld â chartref Airbus UK Brychdyn.

Ryan Fraughan roddodd y pencampwyr ar y blaen yn gynnar cyn i Alex Darlington ychwanegu ail o'r smotyn wedi hanner awr.

Daeth Airbus yn ôl cyn yr egwyl dolch i Chris Budrys, ond daliodd y Seintiau eu gafael ar y fantais i agor bwlch o ddeg pwynt ar frig y tabl.

Canlyniadau'r Sadwrn :-

Caerfyrddin 0-1 Bangor

Prestatyn 0-1 Port Talbot

Lido Afan 0-2 Y Bala

Y Drenewydd 0-0 Aberystwyth

Llanelli 0-1 Cei Connah

Airbus UK Brychdyn 1-2 Y Seintiau Newydd

Tabl Uwchgynghrair Cymru
Gemau Pwyntiau
1. Y Seintiau Newydd 24 52
2. Airbus 24 42
3. Bangor 25 41
4. Prestatyn 25 37
5. Port Talbot 25 36
6. Caerfyrddin 23 30
7. Bala 25 35
8. Cei Connah * 23 32
9. Llanelli 25 30
10. Y Drenewydd 25 27
11. Aberystwyth 24 27
12. Lido Afan 24 17

Canlyniadau hanner cynta'r tymor yn llawn