Toriadau cyngor Powys: 200 swydd yn y fantol

Pencadlys Cyngor Powys Image copyright Powys council
Image caption Gallai'r cyngor arbed £4.8 miliwn drwy dorri 200 o swyddi

Mae cynghorwyr Powys yn cyfarfod unwaith yn rhagor i drafod cynlluniau i ddiswyddo hyd at 200 o weithwyr er mwyn arbed arian.

Dywed y cyngor y bydd angen arbed £30 miliwn dros gyfnod o dair blynedd neu bydd yr awdurdod yn mynd i ddyled.

Cafodd penderfyniad ynglŷn â phecyn o doriadau ei ohirio wrth i'r cynghorwyr gwrdd ar Chwefror 21.

Mae undeb Unison yn gwrthwynebu'r cynllun i dorri swyddi a allai arbed £4.8 miliwn i'r cyngor.

Hefyd mae cabinet y cyngor wedi argymell torri 75% o grantiau cymunedol ac ystyried y posibilrwydd o godi tâl ar drafnidiaeth i ddisgyblion dosbarth chwech.

Ond yn dilyn gwrthwynebiadau dywed y cabinet eu bod yn awr yn bwriadu torri 25% o grantiau cymunedol gan gyflwyno'r toriadau dros gyfnod o dair blynedd.

Mae cynghorwyr hefyd yn cynnal mwy o drafodaethau cyn iddynt benderfynu ynghylch dechrau codi tâl ar drafnidiaeth i ddisgyblion chweched dosbarth ai peidio.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.