Warburton yn ôl ond Jones yn gapten

  • 5 Mawrth 2013
Sam Warburton Image copyright Huw Evans picture agency
Image caption Er bod Sam Warburton yn dychwelyd i'r tîm, bydd Ryan Jones yn parhau fel capten

Mae Sam Warburton yn un o dri newid i dîm Cymru fydd yn wynebu'r Alban ym Murrayfield ddydd Sadwrn, ond bydd Ryan Jones yn aros yn gapten.

Bydd Paul James yn dechrau fel prop oherwydd yr anaf a gafodd Gethin Jenkins yn yr Eidal bythefnos yn ôl, a bydd Alun Wyn Jones yn dychwelyd i'r ail reng ôl yn lle Andrew Coombs.

Daeth Alun Wyn Jones a Warburton i'r maes fel eilyddion yn Rhufain yn dilyn cyfnod allan o'r tîm gydag anafiadau.

Bydd Ryan Jones yn parhau yn gapten er bod Warburton yn ôl, gan i Jones arwain y tîm yn y ddwy fuddugoliaeth oddi cartref ym Mharis a Rhufain.

'Momentwm'

Dywedodd hyfforddwr dros dro Cymru, Rob Howley:

"Rydym wedi cael dwy fuddugoliaeth galed oddi cartref, ond rydym yn gwybod y bydd rhaid i ni fod ar ein gorau i adael Murrayfield gyda'r pwyntiau.

"Mae'n siomedig i Gethin golli'r gêm, ond mae Paul wedi creu argraff ymhob gêm y mae wedi chwarae i ni.

"Mae gennym wledd o brofiad yn dychwelyd gydag Alun Wyn a Sam, ac fe wnaeth y ddau yn dda oddi ar y fainc yn Rhufain.

"Mae Ryan wedi arwain y tîm i ddwy fuddugoliaeth, ac mae'n haeddu bod yn gapten yn erbyn Yr Alban.

"Rydym wedi sôn am fomentwm yn aml yn y bencampwriaeth yma, ac mae'n braf cael mynd i'r gêm gyda dwy fuddugoliaeth y tu cefn i ni, ond mae'r Alban yn yr un sefyllfa ac mae'n mynd i fod yn her."

Albanwyr

Mae'r Alban wedi gwneud dau newid i'r tîm a gurodd Iwerddon bythefnos yn ôl.

Bydd Duncan Weir o Glasgow yn dechrau fel maswr am y tro cyntaf - mae'r chwaraewr 21 oed wedi ennill ei dri chap blaenorol o'r fainc fel eilydd - a bydd yn cymryd lle Ruaridh Jackson yn y safle allweddol.

Mae'r newid arall yn gweld y prop Euan Murray yn dychwelyd yn lle Geoff Cross. Gwrthododd Murray chwarae ar y dydd Sul yn erbyn Iwerddon oherwydd ei ddaliadau crefyddol.

YR ALBAN v.CYMRU: Dydd Sadwrn, Mawrth 9: Murrayfield :-

CYMRU :

15-Leigh Halfpenny (Gleision);

14-Alex Cuthbert (Gleision), 13-Jonathan Davies (Scarlets), 12-Jamie Roberts (Gleision), 11-George North (Scarlets);

10-Dan Biggar (Gweilch), 9-Mike Phillips (Bayonne);

1-Paul James (Caerfaddon), 2-Richard Hibbard (Gweilch), 3-Adam Jones (Gweilch);

4-Alun Wyn Jones (Gweilch), 5-Ian Evans (Gweilch);

6-Ryan Jones (Gweilch, capten), 8-Toby Faletau (Dreigiau), 7-Sam Warburton (Gleision).

Eilyddion: Ken Owens (Scarlets), Scott Andrews (Gleision), Ryan Bevington (Gweilch), Andrew Coombs (Dreigiau), Justin Tipuric (Gweilch), Lloyd Williams (Gleision), James Hook (Perpignan), Scott Williams (Scarlets).

YR ALBAN :

15-Stuart Hogg;

14-Sean Maitland, 13-Sean Lamont, 12-Matt Scott, 11-Tim Visser;

10-Duncan Weir, 9-Greig Laidlaw;

1-Ryan Grant, 2-Ross Ford, 3-Euan Murray;

4-Richie Gray, 5-Jim Hamilton;

6-Robert Harley, 7-Kelly Brown, 8-Johnnie Beattie

Eilyddion: 16-Dougie Hall, 17-Moray Low, 18-Geoff Cross, 19-Alastair Kellock, 20-Ryan Wilson, 21-Henry Pyrgos, 22-Ruaridh Jackson, 23-Max Evans.