Seintiau, Bangor a Phort Talbot yn ennill

Uwchgynghrair Cymru Image copyright Not Specified

Roedd timau hanner uchaf Uwchgynghrair Cymru yn chwarae nos Wener, ac fe ddaeth buddugoliaethau i Fangor, Y Seintiau Newydd a Phort Talbot.

Mae'r Seintiau bellach 11 pwynt ar y baeln ar frig y tabl gan i Airbus, oedd yn ail, golli.

Bangor 2-0 Airbus

Ar ôl curo Airbus yng Nghwpan Cymru y Sadwrn diwethaf mewn gêm agos, roedd disgwyl rhywbeth tebyg yn Stadiwm Book People nos Wener.

Dyna gafwyd, ac roedd y gêm yn gyfartal ddi-sgor wedi 87 o funudau.

Ond yna daeth dwy gôl hwyr gan Gary O'Toole a Robbie Booth i gipio'r pwyntiau i Fangor, a'u codi i'r ail safle yn y tabl ar draul yr ymwelwyr.

Y Seintiau Newydd 3-0 Prestatyn

Fe gafodd y pencampwyr noson dipyn haws wrth groesawu Prestatyn i Groesoswallt.

Sgoriodd Mike Wilde wedi dim ond tri munud ac fe gafodd un arall wedi 33 munud i sicrhau mantais o ddwy gôl ar yr egwyl.

Ychwanegodd Matty Williams un arall yn yr ail hanner i roi buddugoliaeth hawdd i'r Seintiau.

Port Talbot 1-0 Caerfyrddin

Roedd un gôl yn ddigon i Bort Talbot wrth groesawu Caerfyrddin.

Martin Rose a'i cafodd hi wedi 35 munud i godi Port Talbot i'r pedwerydd safle.

Tabl Uwchgynghrair Cymru
Gemau Pwyntiau
1. Y Seintiau Newydd 25 55
2. Bangor 26 44
3. Airbus 25 42
4. Port Talbot 26 39
5. Prestatyn 26 37
6. Caerfyrddin 24 30
7. Bala 25 35
8. Cei Connah * 23 32
9. Llanelli 25 30
10. Y Drenewydd 25 27
11. Aberystwyth 24 27
12. Lido Afan 24 17

Canlyniadau hanner cynta'r tymor yn llawn