Ryan Jones allan o dîm Cymru fydd yn wynebu Lloegr

Ryan Jones yn cael triniaeth wedi ei anaf yn y gêm rhwng Cymru a'r Alban Image copyright Getty Images
Image caption Cafodd Ryan Jones ei anafu wedi 48 munud o'r gêm yn erbyn Yr Alban

Ar ôl cael anaf i'w ysgwydd yn y gêm rhwng Cymru a'r Alban fydd Ryan Jones ddim ar gael i wynebu Lloegr yn Stadiwm y Mileniwm.

Fe gafodd y cyhoeddiad ei wneud mewn cynhadledd i'r wasg gan dîm Cymru ddydd Mawrth.

Fe fydd Cymru a Lloegr yn herio'i gilydd ddydd Sadwrn, gyda'r ddau dîm yn gobeithio am fuddugoliaeth a fyddai'n sicrhau'r bencampwriaeth a'r Gamp Lawn i Loegr.

Bu'n rhaid i Jones, sy'n dathlu ei benblwydd yn 32 oed yr wythnos hon, adael y maes wedi 48 munud ddydd Sadwrn ar ôl cael ei anafu.

Capteniaeth?

Justin Tipuric ddaeth ymlaen fel eilydd i Jones ac mae disgwyl iddo gychwyn y gêm yn erbyn Lloegr.

Fe fydd y tîm yn cael ei gyhoeddi ddydd Iau.

Sam Warburton gymerodd drosodd fel capten am weddill y gêm yn erbyn Yr Alban.

Ond mae'r cyn-chwaraewr rhyngwladol Martyn Williams wedi awgrymu mai Alun Wyn Jones ddylai gymryd y gapteniaeth drosodd petai Jones ddim ar gael.

Roedd buddugoliaeth Cymru yn Murrayfield ddydd Sadwrn y pumed fuddugoliaeth oddi cartref yn olynol i'r Crysau Coch.

Wedi i Loegr guro'r Eidal yn Twickenham o 18-11 ddydd Sul, byddai buddugoliaeth yn erbyn Cymru yn sicrhau Camp Lawn iddyn nhw - y cynta' mewn degawd.

Ond petai Cymru'n ennill o wyth pwynt neu fwy, a sicrhau eu bod yn sgorio mwy o geisiau na Lloegr yn y bencampwriaeth, tîm Rob Howley fyddai'n amddiffyn y teitl.

Bydd ennill o 7 pwynt yn gweld Cymru'n cadw'u gafael ar y bencampwriaeth am gael mwy geisiau oni bai bo' Lloegr yn cael dau neu fwy o geisiau, bryd hynny fe fydd Cymru a Lloegr yn rhannu'r teitl.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.