Apêl am ddyn ar goll ers blwyddyn

Trevor Elias Image copyright Other
Image caption Mae Trevor Elias wedi bod ar goll ers Ebrill 2012

Mae apêl o'r newydd wedi ei wneud am wybodaeth am bensiynwr sydd wedi bod ar goll am flwyddyn.

Does neb wedi gweld Trevor Elias, 77 oed o Abertridwr yn sir Caerffili, ers Ebrill 2012.

Bryd hynny fe wnaeth trigolion lleol ddosbarthu dros 1,000 o daflenni a phosteri mewn ymdrech i ddod o hyd iddo ac fe wnaeth dros 400 o bobl leol fynychu gwylnos.

Gwelwyd ef ar gamerâu cylch cyfyng am 12.23am ar ddydd Gwener Ebrill 6 yn cerdded heibio'r Senotaff yn Senghenydd ac yn cerdded i lawr Commercial Street i gyfeiriad Abertridwr.

Image copyright CCTV Gwent Police
Image caption Mae'r heddlu wedi rhyddhau lluniau camerâu cylch cyfyng o Trevor Elias yn cerdded i lawr Commercial Street tuag at Abertridwr ar noson ei ddiflaniad

Mae'r pensiynwr yn 6'0" o daldra gyda gwallt brown byr.

Fel rheol mae'n gwisgo sbectol, ond doedd y rhain ddim arno pan welwyd ddiwethaf.

Dywedodd llefarydd ar ran Heddlu Gwent: "Rydym yn parhau i chwilio am Trevor.

"Mae swyddogion wedi bod yn gweithio'n agos gyda'r gymuned leol er mwyn dod o hyd i unrhyw wybodaeth a all helpu ddod o hyd i Mr Elias.

"Mae angen i deulu Trevor wybod beth sydd wedi digwydd iddo".

Dylai unrhyw un sydd â gwybodaeth amdano gysylltu â'r heddlu ar 101.

Gall pobl hefyd ffonio Taclo'r Tacle yn ddienw ar 0800 555111.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.