April Jones: Y chwilio ar ben

April Jones Image copyright PA
Image caption Diflannodd April Jones ar 1 Hydref 2012

Dros chwe mis ers i April Jones ddiflannu ym Machynlleth mae'r Heddlu wedi cadarnhau eu bod nhw wedi rhoi'r gorau i chwilio amdani.

Ond maen nhw'n dweud bod swyddogion ar gael i ymateb i unrhyw wybodaeth newydd.

Ers dechrau mis Hydref mae timau arbenigol wedi bod yn cydweithio gyda lluoedd eraill o'r DU i archwilio'r ardal o gwmpas Machynlleth wrth geisio dod o hyd i'r ferch pum mlwydd oed.

Mae nifer o adnoddau wedi'u defnyddio, gan gynnwys unedau tanddwr yr heddlu, swyddogion sy'n arbenigo mewn archwilio mannau cyfyng, timau achub trefol, gwylwyr y glannau a thimau achub mynydd, ynghyd â chŵn arbenigol.

Yn wythnosol mae 17 o dimau achub wedi bod yn rhan o'r gwaith o archwilio ardal 60 cilometr sgwâr, sy'n cynnwys 300 ardal benodol.

Fe fydd Mark Bridger, 47 oed, o flaen llys yr wythnos nesaf, wedi ei gyhuddo o'i llofruddio.

Mae e'n gwadu'r cyhuddiad. ac hefyd yn gwadu cyhuddiad o wyrdroi cwrs cyfiawnder wedi diflaniad April ar Hydref 1 y llynedd.

Fe fydd yr achos yn cychwyn ar Ebrill 29.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.