Dau Gymro yn gadael eu swyddi rheoli

Dean Saunders
Image caption Dim ond am bedwar mis fuo Dean Saunders yn reolwr ar glwb Wolves.

Mae dau Gymro wedi gadael eu swyddi fel rheolwyr ar dimau chwaraeodd yn y Bencampwriaeth yn ystod tymor 2012/13.

Cafodd cytundeb Dean Saunders ei ddiddymu gan glwb pel-droed Wolves, ac ymddiswyddodd Kenny Jackett fel rheolwr Millwall.

'Tymor siomedig'

Bydd Wolves yn chwarae eu pêl-droed yn yr Adran Gyntaf y tymor nesaf wedi tymor siomedig a welodd y clwb yn gorffen un safle o'r gwaelod yn y Bencampwriaeth.

Hon yw'r ail flwyddyn yn olynol i Dean Saunders fod yn rheolwr ar glwb wnaeth orffen yn nhri safle olaf y Bencampwriaeth, wedi iddo orffen ar waelod y tabl gyda Doncaster Rovers yn 2011/12.

Mae Doncaster ar eu ffordd yn ôl i'r Bencampwriaeth wedi iddynt sicrhau dyrchafiad dan reolaeth Cymro arall, Brian Flynn.

Dim ond am 20 gem y bu Dean Saunders yn rheolwr ar Wolves wedi iddo gymryd yr awenau ym mis Ionawr, pan roedd y clwb yn 18fed yn y Bencampwriaeth.

Mewn datganiad fe ddiolchodd y clwb i Saunders am ei waith yno gan ddymuno pob lwc iddo at y dyfodol.

Image caption Chwaraeodd Kenny Jackett dros Gymru ar 31 achlysur.

'Chwilio am her newydd'

Roedd Kenny Jackett wedi bod yn rheoli Millwall ers 2007.

Fe lwyddodd i fynd â'i glwb i'r rownd gynderfynol yng Nghwpan yr FA, ond ni chafodd y llwyddiant hynny ei adlewyrchu yn ymgyrch y clwb yn y Bencampwriaeth.

Dim ond dau bwynt uwchben y tri oedd ar waelod y tabl oedd Millwall ar ddiwedd y tymor.

Mewn datganiad ar wefan y clwb, dywedodd Mr Jackett ei fod yn chwilio am her newydd a'i bod hi'n hen bryd i "reolwr newydd ddod yma i Millwall, un sydd â syniadau ffres".