Sioe yn codi ymwybyddiaeth am ddementia

Myfyrwyr yn cynnal sioe
Mae'r myfyrwyr ym mlwyddyn olaf eu cwrs Teledu, Theatr a Pherfformiad ym Mhrifysgol Glyndŵr

Mae Cymdeithas Alzheimer's Wrecsam yn annog pobl i siarad am ddementia yn ystod Wythnos Ymwybyddiaeth Dementia.

Fel rhan o'r wythnos mae myfyrwyr Teledu, Theatr a Pherfformiad o Brifysgol Glyndŵr yn cynnal perfformiadau o sioe o'r enw 'Open Voices'.

Mae'r sioe yn delio â phwnc dementia a chafodd ei hysgrifennu gan y myfyrwyr eu hunain.

Dywedodd Jacky Baldini, Rheolwr Ardal ar gyfer Cymdeithas Alzheimer's: "Wrth i'r boblogaeth heneiddio rydym i gyd yn wynebu'r risg o ddatblygu dementia.

"Po fwyaf rydym yn gwybod am y cyflwr, y mwyaf parod y byddwn i'w wynebu.

"Mae'r myfyrwyr wedi gwneud llawer o ymdrech i ymchwilio dementia ar gyfer eu perfformiadau ac rydym yn gobeithio y bydd y digwyddiad hwn yn codi ymwybyddiaeth o'r cyflwr."

'Parchu difrifoldeb'

Elen Mai Nefydd, uwch-ddarlithydd theatr a pherfformiad ym Mhrifysgol Glyndŵr, sydd yn cyfarwyddo'r perfformiadau.

"Mae wedi bod yn her cydbwyso parchu difrifoldeb y cyflwr tra, ar yr un amser, ceisio cyfleu'r neges y gall pobl fyw bywydau hapus a bodlon gyda dementia," meddai.

Dywedodd Sara Hughes, un o'r myfyrwyr sydd yn cymryd rhan yn y perfformiadau, eu bod wedi gweithio'n agos gyda staff Cymdeithas Alzheimer's.

"Fel grŵp ein prif amcan yw codi ymwybyddiaeth o ddementia ac addysgu pobl am ba cymorth a chefnogaeth sydd ar gael iddynt.

"Rydym am i'r gynulleidfa sylweddoli pa mor bwysig yw hi i beidio â diystyru dementia," dywedodd.

Bydd y perfformiadau am 1.30pm a 7.30pm ar ddydd Iau a dydd Gwener 23-24 Mai yng Nghanolfan Catrin Finch ar gampws Prifysgol Glyndŵr.

Mae Wythnos Ymwybyddiaeth Dementia yn para tan Mai 25, 2013.