Lle parhaol i gerflun Degas

Amgueddfa Cymru
Image caption Mae'r cerflun yn cael ei ddadorchuddio yn yr amgueddfa

Mae cerflun yr artist o Ffrainc Edgar Degas wedi cael lle parhaol yn Amgueddfa Cymru.

Y Gweinidog Diwylliant a Chwaraeon, John Griffiths, sy'n dadorchuddio'r cerflun efydd o geffyl ar garlam yn yr amgueddfa ddydd Mercher.

Derbyniwyd y cerflun o ystad yr artist enwog Lucian Freud fu farw yn 2011.

Dywedodd Mr Griffiths: "Mae ein casgliadau celf o safon fydeang yn ased enfawr i Gymru wrth i'r amgueddfa fynd o nerth i nerth.

'Denu ymwelwyr'

"Dwi'n hyderus y bydd y gwaith hardd hwn yn denu ymwelwyr i'r amgueddfa."

Roedd Degas yn un o Argraffyddwyr enwog Ffrainc yn y bedwaredd ganrif ar bymtheg.

Yn ôl arbenigwyr, y ceffyl ar garlam oedd y gwaith mwya' trawiadaol o blith y rhai gafodd eu gadael yn ei stiwdio wedi iddo farw.

Cysylltiadau cryf

Roedd cysylltiadau cryf rhwng Freud a Chymru. Cafodd ei hyfforddi gyda'r artist o Gymru, Cedric Morris, a gweithiodd am gyfnod yn y wlad hon.

Dywedodd David Anderson, cyfarwyddwr cyffredinol yr amgueddfa: "Bydd y cerflun hwn yn ychwanegiad pwysig i'n casgliad ni ...

"Yn ogystal â'r gwaith hwn mae dau gerflun arall yr artist yn ein casgliad o gelf Ffrengig."

Straeon perthnasol