Llofruddiaeth: Cadw dyn yn y ddalfa

Y Cambrian Vaults
Image caption Mae'r heddlu'n ymchwilio o hyd

Fe gafodd dyn sydd wedi ei gyhuddo o lofruddiaeth mewn tafarn yn Wrecsam ei gadw yn y ddalfa gan ynadon fore Sadwrn.

Bydd Francisco John Prevete, 45 oed o Weale Court yn Wrecsam, yn ymddangos yn Llys y Goron Yr Wyddgrug fore Llun.

Ymddangosodd gerbron ynadon fore Sadwrn i wynebu cyhuddiad o lofruddio Craig Harold Maddocks o Llai yn Wrecsam.

Cafodd yr heddlu eu galw i ddigwyddiad yn nhafarn y Cambrian Vaults yn oriau man fore Mercher, ond roedd Mr Maddocks eisoes wedi marw yn y fan a'r lle.

Teyrngedau

Mae teulu Craig Maddocks wedi rhoi teyrnged iddo.

Mewn datganiad dywedodd Edna a David: "Roedd yn belydr o oleuni wrth gerdded i mewn i'r ystafell ac yn ganolbwynt unrhyw sefyllfa.

"Hefyd roedd yn baffiwr o'r safon uchaf ond fyddai fyth yn ymladd heb y menig.

"Roedd wastad yn anelu at lefel ffitrwydd - roedd yn bêl-droediwr a dyn poblogaidd."

Dywedodd ei frawd, Daniel: "Mi wna i dy fethu di, frawd, chdi oedd fy efaill a fi oedd dy gysgod - dwi'n dy garu di lawer lawer iawn. Dwi'n dy fethu di, gyfaill."

Ychwanegodd ei chwaer, Lisa: "I fy mrawd mawr - rydan ni oll yn dy fethu di gymaint, chei di fyth dy anghofio ac fe wna i fy ngorau i edrych ar ôl Mam, Dad a dy blant."

Dywedodd Heddlu'r Gogledd y dylai unrhyw un â gwybodaeth ffonio 101 neu Taclo'r Tacle yn ddienw ar 0800 555111.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.