Abertawe yn arwyddo Shelvey

Jonjo Shelvey Image copyright BBC Sport
Image caption Jonjo Shelvey yw'r chweched chwaraewr i ymuno ag Abertawe ers diwedd y tymor

Mae Clwb Pêl-droed Abertawe wedi arwyddo Jonjo Shelvey o Lerpwl am £5 miliwn.

Fe chwaraeodd Shelvey, 21 oed, i Loegr am y tro cyntaf yn erbyn San Marino yn 2012 ac mae wedi chwarae i Lerpwl 69 o weithiau gan sgorio chwe gôl.

Roedd cadeirydd yr Elyrch Huw Jenkins wedi dweud ei fod yn awyddus i gynyddu'r nifer chwaraewyr o Brydain er mwyn cadw at reolau'r Uwchgynghrair.

Mae chwaraewyr Abertawe yng nghanol eu taith o amgylch yr Iseldiroedd.

'Dim dewis'

Dywedodd Mr Jenkins: "Rhaid i ni wneud yn siŵr bod cynnwys ein carfan yn iawn.

"Yn amlwg, rhan o hynny yw gwneud yn siŵr bod gennym ddigon o chwaraewyr Prydeinig.

"Rhaid i ni wneud hynny - does dim dewis oherwydd y rheolau."

Shelvey yw'r chweched chwarewr newydd i ymuno â'r Elyrch ers diwedd y tymor - mae'r clwb eisoes wedi arwyddo Alejandro Pozuelo, Jose Canas, Jordi Amat, Gregor Zabret a Alex Gogic.

Straeon perthnasol