Aur i Aled Davies

Aled Davies Image copyright Getty Images
Image caption Mae Aled Davies yn cystadlu yng nghystadleuthau'r ddisgen a thaflu pwysau

Mae Aled Davies wedi enill ei ail fedal aur ym Mhencampwriaeth Athletau Paralympaidd y byd yn Lyon.

Enillodd Davies gystadleuaeth y ddisgen yng nghategori F42.

Llwyddodd y dyn 22 oed o Ben y Bont i daflu record rhanbarthol o 47.62 metr i sicrhau teitl pencampwr y byd.

Daw'r fuddugoliaeth wedi medal aur yng nghystadleuaeth taflu pwysau ddydd Sul, a blwyddyn wedi ei fuddugoliaeth yng ngemau Paralympaidd Llundain 2012.

Ni chafodd y Cymro ddechrau gwych i'r gystadleuaeth gyda dau dafliad annheg yn y rowndiau cynnar, ond llwyddodd Davies i ymlacio i daflu 47.62m, dros 6m o flaen gweddill y cystadleuwyr.

"Doedd hi ddim yn hawdd, ond mae gadael fel pencampwr mewn dwy gystadleuaeth yn wythnos dda o waith," meddai.

"Roedd hi'n gystadleuaeth anodd ac roeddwn i eisiau dechrau hefo tafliad da ond llwyddais i ennill yn y diwedd a dyna sy'n bwysig."

Dydy'r Cymro heb golli unrhyw gystadleuaeth y mae o wedi cystadlu ynddi eto y tymor yma.

Straeon perthnasol