Angladd milwr a fu farw ar y Bannau

Craig Roberts Image copyright Wales News Service
Image caption Bu Craig Roberts yn gweithio fel athro yn Llundain

Bydd angladd milwr a fu farw tra ar gwrs hyfforddi'r SAS ym Mannau Brycheiniog yn cael ei gynnal ddydd Iau.

Roedd Craig Roberts o Fae Penrhyn yng Nghonwy un o dri a fu farw.

Bydd ei angladd yn cael ei gynnal yn Eglwys y Drindod Sanctaidd yn Llandudno am 1.45pm.

Fe wnaeth yr is-gorporal a milwr arall Edward Mayer, 31 oed, farw ar ddiwrnod y cwrs hyfforddi ar Orffennaf 13.

Bu farw trydydd milwr, Corporal James Dunsby, ar Orffennaf 30.

Bydd cwest i'w farwolaeth ef yn cael ei agor yn Aberdâr ddydd Iau.

29.5C

Roedd y tri milwr o aelodau o'r fyddin diriogaethol ac yn ceisio ymuno gyda'r SAS tiriogaethol.

Roedd y dynion ar daith 40 milltir yn y Bannau ar Orffennaf 13, gyda thymheredd yn cyrraedd 29.5C (85F).

Bu farw'r is-gorporal Roberts am 5.15 pm ar fynydd Pen y Fan. Dair awr yn ddiweddarach bu farw Mr Maher yn ysbyty Tywysog Charles ym Merthyr.

Roedd yr is-gorporal wedi bod yn aelod o'r Fyddin Diriogaethol am bum mlynedd.

Cafodd cwest i'w farwolaeth ei agor a'i ohirio yn Aberhonddu fis diwethaf.

Straeon perthnasol