Wrecsam 2-1 Welling

Image copyright bbc

Wrecsam 2-1 Welling

Yn Uwchgynghrair y Gyngres yr eilydd Rob Ogleby gyda'i gyffyrddiad cynta' sicrhaodd fuddugoliaeth i Wrecsam yn erbyn Welling United ar y Cae Ras.

Aeth Wrecsam ar y blaen pan sgoriodd Joe Clarke â'i droed dde ar ôl ychydig dros chwarter awr.

Bum munud ar hugain yn ddiweddarach tarodd Joe Healy yn ôl i'r ymwelwyr.

Ogleby setlodd y mater yn yr ail hanner, ergyd rymus wyth munud cyn y diwedd.

Dywedodd y rheolwr Andy Morell: "Roedd yr hanner cynta'n anodd a'r sefyllfa'n well yn yr ail.

"Mi ildion ni ormod o giciau rhydd ond chwarae teg i Rob (Ogleby), os yw'r bêl ganddo, mae'n bygwth."

Northampton 3-1 Casnewydd

Yn Ail Adran y Gynghrair stori arall oedd hi i Gasnewydd.

Aeth Northampton ar y blaen pan beniodd Jacob Blyth ar ôl 25 munud.

Funud yn ddiweddarach sgoriodd Roy O'Donovan. 2-0.

Yn yr ail hanner rhwtodd Gary Deegan halen yn y briw pan gafodd Northampton gôl arall.

Ddwy funud cyn y diwedd sgoriodd Conor Washington i'r Cymry.

Dywedodd rheolwr Casnewydd Justin Edinburgh: "Yn fy marn i, doedd y sgôr ddim yn adlewyrchu'r gêm.

"Roedd ein perfformiad yn dda a Northampton ar y dro'd ôl am gyfnodau hir.

"Ond roedd eu golgeidwad yn wych. Yn wir, fe oedd chwaraewr y gêm."

Straeon perthnasol