Saethu Casnewydd: heddlu'n dod o hyd i ddrylliau

Saethu Casnewydd Image copyright Arall
Image caption Cafodd heddlu arfog eu galw fore Iau

Mae'r heddlu, sy'n ymchwilio wedi i fenyw 46 oed gael ei saethu'n farw, wedi dod o hyd i dri dryll ei gŵr sy' wedi gwahanu.

Yn y cyfamser, mae ei gŵr 49 oed Christopher Parry mewn cyflwr difrifol iawn ond sefydlog yn yr ysbyty wedi'r saethu yng Nghasnewydd ddydd Iau.

Cafodd plismyn arfog eu galw i Seabreeze Avenue oddi ar Stryd Willenhall am 8.45 fore Iau.

Dywedodd yr heddlu fod Mr Parry yn meddu ar y drylliau'n gyfreithiol mewn tŷ yng Nghwmbrân.

Deellir fod Mrs Parry yn ddiweddar wedi symud o Groesyceiliog, Cwmbrân, i Gasnewydd.

Mae'r achos wedi ei gyfeirio i Gomisiwn Annibynnol Cwynion yr Heddlu.

'Mewn perthynas'

Cafodd y ddau eu cludo i Ysbyty Brenhinol Gwent ond bu farw'r fenyw.

Dywedodd y Prif Arolygydd Huw Nicholas: "Roedd y ddau mewn perthynas o'r blaen a hyn wedi dod i sylw'r heddlu.

"Am y rheswm hwn rydym ni wedi cyfeirio'r mater i'r comisiwn."

Dywedodd yr IPCC: "Mae'r cyfeirio'n ymwneud â chyswllt rhwng yr heddlu a'r cwpl cyn y digwyddiad.

"Ond mae yna ymchwiliad yn cael ei gynnal gan yr heddlu i'r saethu a dyna yw'r flaenoriaeth ar hyn o bryd."

Straeon perthnasol