Malky Mackay yn gobeithio denu mwy o chwaraewyr

Malky Mackay Image copyright Huw Evans picture agency
Image caption Mae Malky Mackay yn gobeithio arwyddo mwy o chwaraewyr

Mae rheolwr Caerdydd wedi dweud ei fod yn gobeithio denu mwy o chwaraewyr i'r clwb cyn bod y cyfnod trosglwyddo yn dod i ben.

Mae'r clwb pêl-droed newydd arwyddo Gary Medel o Sevilla i'r tîm. Dyma'r pumed chwaraewr sydd wedi dweud ei fod yn symud i Gaerdydd yn ddiweddar.

Yn ôl Malky Mackay fe fydd yna fwy o newidiadau os yw'r chwaraewyr iawn ar gael:

"Rydyn ni yn dal i edrych ac yn trio ond dim ond ar gyfer chwaraewyr dw i'n teimlo bydd yn gwella'r grŵp.

"Fel pawb arall, gyda thair wythnos i fynd o ran trosglwyddo chwaraewyr, rydyn ni yn edrych i weld a allith unrhyw un wella ein carfan.

"Mae gyda ni nifer o heyrn yn y tân ar y foment ac maen nhw i gyd yn symud ymlaen ar lefelau gwahanol.

"Pe byddai modd i ni gael o leia' ddau arall, yna byddai hynny yn helpu."

£11m

Mae Gary Medel sydd yn dod o Chile wedi cael cytundeb pedair blynedd gyda'r tîm ar yr amod ei fod yn cael caniatâd gweithio ym Mhrydain. Dywed rhai adroddiadau bod y cytundeb werth £11 miliwn.

Image copyright Huw Evans picture agency
Image caption Cytundeb pedair blynedd sydd gan y chwaraewr o Chile

Roedd y dyn 26 oed yn y gêm gyfeillgar yn erbyn Athletic Bilbao ddydd Sadwrn pan gurodd Caerdydd o ddau gol i un.

Ddydd Sadwrn nesaf mi fyddan nhw'n dechrau'r tymor newydd yn yr uwch-gynghrair a hynny yn West Ham.

Straeon perthnasol