Grŵp anodd i Abertawe yn Ewrop

Wayne Routledge Image copyright Getty Images
Image caption Abertawe'n dathlu wrth guro Petrolul wythnos yn ôl

Daeth yr enwau o'r het ar gyfer rownd y grwpiau yng Nghynghrair Europa ac mae Abertawe mewn grŵp anodd.

Llwyddodd yr Elyrch i sicrhau eu lle yn y rownd er iddyn nhw golli ail gymal eu gêm yn erbyn Petrolul Ploiesti nos Iau, gan ennill o 6-3 ar gyfanswm goliau dros y ddau gymal.

Bydd Abertawe yn Grŵp A ac yn herio Valencia o Sbaen, Kuban o Rwsia a St Gallen o'r Swistir.

Mae Valencia wedi ennill pencampwriaeth Sbaen chwe gwaith a Chwpan Sbaen saith gwaith. Maen nhw hefyd wedi cyrraedd rownd derfynol Cynghrair y Pencampwyr ddwywaith.

Newydd ennill dyrchafiad o ail adran y Swistir y mae St Gallen ond nhw yw'r clwb pêl-droed hynaf yn y wlad.

Clwb sy'n chwarae yn Krasnodar ar gyrion Moscow yn Rwsia yw Kuban. Fe orffennon nhw'r tymor diwethaf yn bumed yn y brif adran.

Yn sicr, fe fydd Michael Laudrup yn edrych ymlaen at ddychwelyd i Valencia gan iddo fod yn rheolwr yn Sbaen am sawl tymor.

Bydd y ddau glwb uchaf yn y 12 grŵp yn mynd ymlaen i rownd y 32 olaf ynghyd â'r clybiau sy'n gorffen yn drydydd yn eu grwpiau yng Nghynghrair y Pencampwyr.

Trefn y gemau

Bydd y gêm anoddaf yn gyntaf i'r Elyrch wrth iddyn nhw deithio i Valencia ar Fedi 19 cyn dwy gêm ar y Liberty wedi hynny. Yna taith i Rwsia cyn i Valencia ddod i Abertawe, a'r gêm olaf yn y grŵp fydd y daith i'r Swistir.

Medi 19 - Valencia (o.c.)

Hydref 3 - St.Gallen (g)

Hydref 24 - Kuban Krasnodar (g)

Tachwedd 7 - Kuban Krasnodar (o.c.)

Tachwedd 28 - Valencia (g)

Rhagfyr 12 - St Gallen (o.c.)

Straeon perthnasol