Ar gof a chadw

Clifford Burkett Image copyright other
Image caption Bu farw Clifford Burkett yn 92 oed

Mae rôl uned achub arbennig yn ystod yr Ail Ryfel Byd ar gof a chadw oherwydd yr hyn ddywedodd cyn-aelod o'r lluoedd arfog oedd yn gwasanaethu yn Sir Benfro.

Ond ychydig wythnosau ar ôl rhoi'r gwybodaeth am yr uned achub awyr a môr yn Ninbych-y-pysgod bu farw Clifford Burkett, 92 oed, un o'r rhai olaf o'r uned oedd dal yn fyw.

Mae hanes yr uned ar wefan HistoryPoints.org.

Yn ystod y rhyfel roedd nifer o feysydd awyr yn Sir Benfro a Doc Penfro oedd canolfan fwyaf badau hedfan ym Mhrydain.

Roedd yr uned yn Ninbych-y-Pysgod yn Swyddfa'r Harbwr.

Gan fod y llanw allan am oriau bob diwrnod, meddai Mr Burkett, roedd y gwaith yn llawer anoddach.

Roedd wedi sôn am sut yr oedd dynion yn ceisio cyrraedd y badau oedd yn cael eu hangori wrth bier Fictorianaidd y dre'.

Yn anodd

Image copyright Other
Image caption Doc Penfro oedd canolfan fwyaf badau hedfan ym Mhyrdian yn ystod yr Ail Ryfel Byd

Am fod y gwaith yn anodd ac yn araf, meddai, byddai criwiau achub yn penderfynu byw a chysgu ar y badau am ddyddiau ar y tro.

Roedd Mr Burkett yn y dre' rhwng Medi 1943 a Mawrth 1944 cyn bod yn rhan o'r cyrchoedd ar Normandi.

Dywedodd ei ferch Ruth Crowther: "Fe aethom â Dad i Ddinbych-y-Pysgod ym mis Mehefin ac roedd mor hapus i fod yno.

"Ac roedd yn cofio'n glir rai o'r hen adeiladau."

Dywedodd Rhodri Clark, golygydd gwefan HistoryPoints.org: "Mor drist oedd clywed am ei farwolaeth yn 92 oed.

"Rydym yn ddiolchgar iddo am adrodd ei hanes a'i brofiadau yn glir a dealladwy er mwyn rhoi cyfle i'r cyhoedd gael deall yn well am y cyfnod hwn yn hanes y dre'."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.