Bad Achub newydd y Mwmbwls yn cyrraedd

Bad Achub newydd Image copyright Nicholas Leach
Image caption Mae'r tîm achub yn hyderus y bydd y gwch newydd yn helpu i achub mwy o fywydau ger arfordir de Cymru

Mae bad achub newydd gwerth £2.7m wedi cyrraedd ei gartref newydd yn y Mwmbwls, ger Abertawe.

Mae gan Tamar y Mwmbwls y dechnoleg ddiweddaraf, i helpu achub y rheiny mewn trafferthion ger arfordir Abertawe, ac mae'n fwy ac yn gyflymach na'r cwch blaenorol.

Dyma'r diweddaraf o bedwar bad achub newydd gafodd eu hariannu gan Gronfa Coffa Roy Barker, y dyn o Jersey a adawodd ei stad i Sefydliad Brenhinol y Badau achub yn 1992.

Roedd Mr Barker wedi gwneud arian o ffermio ac anifeiliaid, ac roedd yn gefnogwr o'r RNLI, ac mae badau cafodd eu hariannu gan ei gronfa wedi bod yn achub bywydau oddi ar Ynysoedd y Sianel, Wick yn yr Alban a Howth yn Iwerddon.

Dywedodd Martin Double o'r RNLI yn y Mwmbwls y bydd hi'n bleser cael defnyddio'r cwch am y tro cyntaf.

"Byddaf yn falch iawn cael dod a'r bad achub newydd yn ôl i Abertawe am y tro cyntaf." meddai.

"Mae e wir yn gwch arbennig ac mae gen i bob ffydd y bydd yn helpu ni i achub mwy o fywydau ger arfordir de Cymru."

Mae'r cwch wedi teithio ar hyd arfordir de Lloegr ac o amgylch Cernyw cyn cyrraedd Abertawe, lle mae pum aelod o'r tîm achub yn y Mwmbwls wedi treulio wythnos yn dod i arfer hefo'r Tamar a dysgu i ddefnyddio'r dechnoleg newydd.

Straeon perthnasol