Gwobr arbennig i Siân

Sian Phillips: Gwobr arbennig Image copyright Arall
Image caption Dechreuodd y sioe gerddorol yn Sheffield ym Mehefin

Yn 80 oed mae Siân Phillips wedi ennill gwobr yr actores ategol orau oherwydd ei rhan mewn sioe gerddorol.

Cyhoeddwyd hyn yn nigwyddiad Gwobrwyon Theatr y Deyrnas Gyfun.

Mae Siân wedi bod yn actio yn This Is My Family ddechreuodd yn theatr y Sheffield Crucible ym Mehefin. Hi yw'r fam-gu anghofus.

Hon oedd y sioe gerddorol orau, yn ôl y beirniaid, a'r cyfarwyddwr yw Daniel Evans o'r Rhondda.

Ganwyd Siân ar Fai 14 1934 a chafodd ei magu yn Rhydaman.

Athroniaeth

Cafodd ei haddysg yn Ysgol Ramadeg Pontardawe.

Yn un o actorion mwyaf amlwg Cymru, dechreuodd hi berfformio yn ifanc iawn, ar y llwyfan, y teledu a'r radio i'r BBC.

Astudiodd hi Saesneg ac yna athroniaeth yn y coleg.

Gweithiodd fel cyflwynwraig ar y BBC yn y Gymraeg a'r Saesneg a darllen y newyddion.

Enillodd ysgoloriaeth i RADA ac yno dyfarnwyd Medal Aur Bancroft iddi hi ac fe ymddangosodd yn Llundain am y tro cyntaf mewn cynhyrchiad o Hedda Gabler.