Seiclo: Nifer o Gymry yn nhîm Prydain

Great Britain women's pursuit team Image copyright Getty Images
Image caption Enillodd tîm ras ymlid y merched fedal aur ym Mhencampwriaeth Ewrop

Mae tîm Prydain Fawr wedi enwi carfan o 17 ar gyfer Cwpan y Byd ar y trac ym Manceinion yr wythnos nesaf, gyda nifer o Gymry yn eu plith.

Enillodd Prydain fedalau aur (3), arian (2) ac efydd (3) ym Mhencampwriaeth Ewrop yn ddiweddar.

Roedd Elinor Barker o Gaerdydd yn y tîm gyda Laura Trott a Dani King, a enillodd fedal aur.

Bydd y gwibiwr Becky James yn ymuno gyda Barker yn nhîm y merched.

Yn y rasys hirach bydd dau Gymro yn nhîm y dynion, a'r ddau sydd wedi eu dewis yw Owain Doull a Sam Harrison.

Bydd rownd gyntaf Cwpan y Byd yn cael ei chynnal ym Manceinion rhwng Tachwedd 1-3 cyn yr ail rownd ym Mecsico ym mis Rhagfyr.

Fe fydd y drydedd rownd, sef y rownd olaf, yn cael ei chynnal ym mis Ionawr 2014, ond nid yw'r lleoliad ar gyfer y rownd honno wedi ei gadarnhau hyd yma.

Bydd y cystadleuwyr yn ceisio ennill pwyntiau i gymhwyso ar gyfer Pencampwriaeth y Byd 2014 yn Cali, Colombia.

Tîm Seiclo Prydain - Cwpan y Byd, rownd 1, Manceinion :-

Gwibio (dynion): Matt Crampton, Kian Emadi, Jason Kenny, Phil Hindes

Gwibio (merched):Becky James, Jess Varnish, Vicky Williamson

Rasys hir (dynion): Steven Burke, Ed Clancy, Jon Dibben, Owain Doull, Sam Harrison, Andy Tennant

Rasys hir (merched):Elinor Barker, Dani King, Joanna Rowsell, Laura Trott