Rhybudd Laudrup rhag llaesu dwylo

Michael Laudrup Image copyright Getty Images
Image caption Mae Michael Laudrup yn gwybod bod gemau anodd ar ôl gan Abertawe

Mae rheolwr Abertawe Michael Laudrup wedi dweud na all ei dîm laesu dwylo yn erbyn Kuban Krasnodar yng nghynghrair Europa.

Mae'r Elyrch ar frig Grŵp A wedi dwy fuddugoliaeth yn eu dwy gêm gyntaf, tra bod y clwb o Rwsia wedi colli eu dwy gêm nhw.

Byddai trydedd buddugoliaeth yn gosod Abertawe ar drothwy lle yn rownd y 32 olaf, ond mae Laudrup yn mynnu y bydd angen i'w dîm fod ar eu gorau.

"Pan ydych chi'n chwarae yn Ewrop a ddim yn chwarae 100% fe allwch chi golli. Mae mor syml â hynny," meddai.

"Nid yw'r tîm yma yn un drwg. Mae ganddyn nhw chwaraewyr da."

Fe gafodd Laudrup gyfnod o weithio yn Rwsia fel hyfforddwr Spartak Moscow, ac mae'n gwybod y byddai triphwynt nos Iau yn gam mawr tuag at y rownd nesaf.

Mae Abertawe eisoes wedi curo Valencia o 3-0 yn Sbaen cyn curo St Gallen o'r Swistir yn Stadiwm Liberty o 1-0.

Fe fyddan nhw'n teithio i Rwsia i wynebu Krasnodar ar Dachwedd 7, cyn cwblhau'r grŵp gyda thaith i St Gallen ac yna gêm gartref yn erbyn Valencia ym mis Rhagfyr.

Ond mynnodd Laudrup bod cael pwyntiau llawn nos Iau yn flaenoriaeth, gan ychwanegu:

"Mae'r ddwy gêm nesaf oddi cartref yn rhai anodd. Rhaid mynd i Rwsia gyda'r holl deithio a'r gwahaniaeth amser, ac yn y Swistir fe fydd rhaid ymdopi â'r tywydd oer.

"Bydd ymweliad Valencia yn anodd hefyd felly mae heno yn gêm allweddol i ni.

"Fe ddylai 10 pwynt fod yn ddigon, ond efallai bydd angen 11."

Straeon perthnasol