Cam ymlaen

Yr Athro Julie Williams Image copyright Other
Image caption Roedd yr Athro Julie Williams o Brifysgol Caerdydd yn un o arweinwyr yr astudiaeth

Mae'r astudiaeth fwyaf erioed o'i bath wedi darganfod 11 o enynnau sydd wedi eu cysylltu am y tro cyntaf gyda'r math o glefyd Alzheimer sy'n effeithio ar bobl hŷn.

Roedd gwyddonwyr o Brifysgol Caerdydd ymhlith arweinwyr y cywaith rhyngwladol a wnaeth y darganfyddiad.

Mae'r datblygiad yn cael ei ystyried fel cam arwyddocaol ymlaen yn nealltwriaeth gwyddonwyr o glefyd Alzheimer, gan ei fod yn cynnig trywydd newydd ar gyfer gwaith ymchwil ac yn galluogi dealltwriaeth well o'r cyflwr.

Cyhoeddwyd y gwaith ymchwil yng nghylchgrawn Nature Genetics.

'Cam sylweddol'

Dywedodd yr Athro Julie Williams o Brifysgol Caerdydd: "Trwy gyfuno arbenigedd ac adnoddau genetegwyr ar draws y byd, rydym wedi gallu goresgyn ein greddfau cystadleuol naturiol i gyflawni cam sylweddol ymlaen..."

"Yr hyn a'n synnodd fwyaf ynghylch y casgliadau oedd y patrwm cryf iawn a ddangosodd nifer o enynnau'n cysylltu adwaith imiwn y corff mewn achosi dementia," ychwanegodd.

"Mae gennym bellach 21 o enynnau rydyn ni'n gwybod eu bod yn cynyddu'r risg o ddatblygu Alzheimer's, er bod cyfran fawr o'r risg genynnol ar gyfer y clefyd yn dal heb ei esbonio.

"Mae dal angen ymchwil pellach i leoli'r genynnau eraill sy'n gysylltiedig cyn y gallwn gael darlun llawn.

"Fe fyddwn ni nawr yn troi ein sylw at bobl gydag Alzheimer's sy'n dechrau'n gynnar - pobl yn eu 40au a'r 50au...

"Gallai eu pensaernïaeth enetig nhw fod yn allweddol i ddarganfod hyd yn oed rhagor o enynnau sy'n gysylltiedig â chlefyd Alzheimer."

Dywedodd yr Athro Williams y byddan nhw hefyd yn edrych ar gasgliadau cyfres o astudiaethau mawrion yn archwilio rôl ffactorau amgylcheddol yn natblygiad y cyflwr, gan edrych ar beth sy'n cynyddu'r risg, a beth sy'n ei leihau.

Y gobaith, meddai, oedd y byddai hynny'n rhoi cyfle i bobl leihau eu risg nhw o ddatblygu'r cyflwr.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.