Pro 12: Rhanbarthau Cymru

Zebre 16-16 Scarlets

Roedd hi'n gêm gyfartal 16-16 rhwng y Scarlets a Zebre yng nghynghrair y Rabodirect Pro12 nos Wener.

Y sgôr ar yr egwyl yn yr Eidal oedd 10-10.

Cafodd Davies gais i'r Cymry a chiciodd Shingler a Priestland (2) giciau cosb. Trosodd Shingler.

Garcia groesodd y llinell i'r Eidalwyr. Ciciodd Iannone (2) ac Orquera giciau cosb a throsodd Iannone.

Gweilch 40-17 Dreigiau

Llwyddodd Justin Tipuric i sgorio dau gais yn erbyn y Dreigiau ar y Liberty.

Ciciodd Dan Biggar 17 o bwyntiau ac roedd cais Scott Baldwin yn golygu pwynt bonws.

Tom Prydie a Francisco Chaparro sgoriodd geisiau i'r Dreigiau.

Trosodd Kris Burton a chicio cic adlam.

Roedd pryder am fod wythwr y Dreigiau Toby Faletau wedi anafu ei wddf ac yn gorfod mynd i Ysbyty Treforys.

Ulster 39-21 Gleision

Sgoriodd Ulster bump o geisiau yn Ravenhill.

Dan Tuohy a Jared Payne groesodd y llinell gynta' cyn i Robin Copeland daro'n ôl i'r Cymry.

Ar yr egwyl y sgôr oedd 16-11.

Sgoriodd Luke Marshall gais i Ulster cyn i gais Richard Smith olygu ychydig o hunanbarch i'r Gleision.

Rhedodd Andrew Trimble fel milgi, gan ennill y pwynt bonws ac roedd cais Tuohy'n goron ar y cyfan.

Chwe buddugoliaeth yn olynol i Ulster.