Rygbi 13: Cymru 16-32 Yr Eidal

  • 26 Hydref 2013
Cais Rhodri Lloyd
Rhodri Lloyd sgoriodd ail gais Cymru

Daeth siom i Gymru yn eu gêm agoriadol yng Nghwpan Rygbi 13 y Byd yng Nghaerdydd.

Yn dilyn seremoni agoriadol ardderchog, enillodd Awstralia y gêm gyntaf yn y gystadleuaeth o 28-20 yn erbyn Lloegr.

Yn syth wedi hynny roedd Cymru'n dechrau eu hymgyrch nhw yn erbyn Yr Eidal, ond colli fu eu hanes.

Er nad yw'r Eidal yn draddodiadol yn un o fawrion y gamp, fe wnaethon nhw guro Lloegr mewn gêm baratoadol yr wythnos ddiwethaf.

Roedd y gêm yn un gyffrous gyda'r ddau dîm yn sgorio ceisiau bob yn ail. Yr Eidalwyr aeth ar y blaen yn gynnar gyda'r cyntaf o ddau gais gan Aiden Guerra, ond roedd hi'n gyfartal 6-6 wedi trosgais gan Ben Evans.

Fe sgoriodd Guerra ei ail ac fe ddaeth gôl gosb i'r ymwelwyr cyn i Rhodri Lloyd gau'r bwlch ychydig cyn yr egwyl gyda chais ardderchog.

Sgoriodd Aiden Guerra dri chais i'r Eidal

Blinder

Wedi dim ond dau funud o'r ail hanner aeth Cymru ar y blaen am y tro cyntaf wrth i Elliot Kear groesi yn y gornel.

Ond bum munud yn ddiweddarach fe sgoriodd Josh Mantellato gais arall i'r Eidalwyr i'w gwneud hi'n 18-16.

Roedd Cymru dan bwysau am gyfnodau hir, ond eto'n amddiffyn yn wych i gadw'r Eidalwyr allan, ac roedden nhw'n edrych yn beryglus pan yn gwrthymosod.

Gydag ychydig dros ddeng munud yn weddill daeth ergyd fawr i Gymru pan groesodd James Tedesco am gais arall i'r Eidalwyr i'w gwneud hi'n 22-16.

Roedd yr ymdrech amddiffynnol wedi cael effaith ar Gymru, ac roedd y blinder yn amlwg wrth i Guerra groesi am ei hat-tric.

Daeth cais arall i Marc Minichello i roi halen ar y briw i'w Cymry yn y funud olaf.

Er bod y golled yn ergyd, mae gan Gymru obaith o hyd o gyrraedd rownd yr wyth olaf, ond mae'n rhaid ennill y ddwy gêm sy'n weddill.

Fe fydd Cymru'n wynebu'r Unol Daleithiau ar y Cae Ras yn Wrecsam ac yna Ynysoedd Cook ar y Gnoll yng Nghastell-nedd.