Chris Coleman y ffefryn i swydd wag Crystal Palace

Chris Coleman
Image caption Ai Chris Coleman fydd yn arwain Cymru ar gyfer gêm gyntaf grŵp rhagbrofol Ewro 2016?

Mae'r dyfalu am ddyfodol rheolwr Cymru Chris Coleman yn parhau.

Erbyn hyn fe yw ffefryn clir y rhan fwya' o'r bwcis i lenwi'r swydd wag yn Crystal Palace.

Er hynny gwadu mae Cymdeithas Bêl-droed Cymru bod unrhyw gynnig wedi ei wneud am ei wasanaethau gan y tîm sydd ar waelod Uwch-gynghrair Lloegr.

Gadawodd Ian Holloway Palace ddiwedd mis Hydref ac mae'r clwb wedi bod yn chwilio am reolwr newydd ers hynny.

Yn ddiweddar dywedodd chwaraewr canol cae Cymru a Celtic Joe Ledley ei fod yn gobeithio na fydd Coleman yn gadael Cymru.

"Rwy'n gobeithio y gallwn ni ei gadw yng Nghymru ac y gallwn ni symud ymlaen gyda'n gilydd," meddai.

"Mae wedi gwneud swydd dda [i Gymru] - er iddo gymryd ychydig o amser roedd yn ddiwedd gwych i'r grŵp.

"Mae e wedi bod yn wych ers i mi fod yna ac mae pawb yn ei gefnogi."

Gorffennodd Cymru'n bumed allan o'r chwech yn eu grŵp ac ers hynny mae cwestiynau wedi cael eu gofyn ynglŷn â phwy fydd yn arwain y tîm yn ystod gemau rhagbrofol Ewro 2016.

Mae cytundeb Coleman yn dod i ben yn dilyn y gêm gyfeillgar yn erbyn y Ffindir ar 16 Tachwedd ac er ei fod wedi cael cynnig cytundeb newydd yn flaenorol, nid yw'n glir os yw'r cynnig hwnnw'n dal ar gael iddo.

Straeon perthnasol