Trafod hunaniaeth Cymru ym Marcelona

Universitat Pompeu Fabra Image copyright Universitat Pompeu Fabra
Image caption Trafod hunaniaeth Cymru fyddan nhw yn y gynhadledd

Mae cenedlaetholdeb yng Nghymru yn cael ei drafod dros y dŵr mewn cynhadledd ym Marcelona.

Fe drefnwyd y digwyddiad am fod partneriaeth newydd wedi datblygu rhwng prifysgol Abertawe ac Universitat Pompeu Fabra (UPF).

Yn ystod y diwrnod mi fydd academwyr yn trafod sut mae pobl Cymru wedi mynd ati i greu hunaniaeth i'r wlad heddiw ac yn y gorffennol.

Mi fydd ail ddigwyddiad, fydd yn canolbwyntio ar Gatalonia, yn cael ei gynnal ym mhrifysgol Abertawe ym mis Ebrill 2014.

Bydd arbenigwyr o Gymru yn cymryd rhan gan gynnwys siaradwyr o Brifysgol Abertawe.

Yn ôl y trefnwyr mae yna gymhariaethau rhwng y ddwy wlad am eu bod nhw wedi bod yn ceisio cael mwy o bwerau.

Mae Catalonia ar hyn o bryd yn trafod cynnal refferendwm i gael mwy o lais neu i fod yn annibynol.

Ac fe gyhoeddodd David Cameron wythnos diwethaf y bydd rhai trethi a phwerau benthyg yn cael eu rhoi i Gymru.

Dywedodd yr athro Mike Sullivan, Is-Lywydd Prifysgol Abertawe bod yna bethau yn gyffredin rhwng y ddwy brifysgol a'i bod eisiau cryfhau eu perthynas:

"Rydyn ni yn bwriadu defnyddio'r enghraifft yma o gydweithio gyda UPF er mwyn datblygu cysylltiadau eraill rhwng y ddwy brifysgol ac ar draws sawl maes.

"Mi fydd hyn yn golygu gwneud gwaith ymchwil ar y cyd a datblygu rhaglenni addysgu. Mi fydd hefyd yn golygu cyfleoedd buddsoddi newydd yn enwedig ar lefel Ewropeaidd."

Mae gan y brifysgol hefyd gysylltiadau efo prifysgolion yn Texas a Grenoble sydd wedi arwain at gydweithio o ran gwaith ymchwil.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.