£450,000 er mwyn prynu gwaed o tu allan i Gymru

rhoddwr gwaed Image copyright bbc
Image caption Hyfforddi staff sydd wedi golygu bod yna lai o waed wedi ei gasglu yng Nghymru meddai Gwasanaeth Gwaed Cymru

Mae Gwasanaeth Gwaed Cymru wedi gwario dros £450,000 er mwyn cael gafael ar waed o't tu allan i Gymru ers dechrau'r flwyddyn.

Yn ôl ffigyrau gafodd eu cyhoeddi o dan y ddeddf rhyddid gwybodaeth mae'r swm sydd yn cael ei dalu wedi codi yn flynyddol ers tair blynedd.

Gofynnwyd i'r gwasanaeth am y costau o'r flwyddyn 2010/11 tan 2013.

Y rheswm am y cynnydd, meddai Gwasanaeth Gwaed Cymru, ydy bod eu gweithwyr wedi bod yn cael eu hail hyfforddi am fod yna newidiadau yn digwydd o ran casglu gwaed pobl.

Mae'r datganiad yn dweud bod yr hyfforddiant yn un "cymhleth ac yn golygu cyfnod o amser fel bod staff yn medru cyfnerthu eu sgiliau".

Mae hynny wedi golygu bod llai o waed wedi bod yn cael ei gasglu yng Nghymru.

Dangosodd y ffigyrau bod:

  • Dros £62,000 wedi ei wario yn 2010/11;
  • Dros £129,000 yn 2011/12;
  • Dros £318,000 yn 2012/13;
  • Dros £460,000 tan y cyfnod presennol yn 2013.

Roedd y cais rhyddid gwybodaeth hefyd yn datgelu bod mwyafrif y gwaed sydd yn cael ei gasglu yn dal i fod yn waed gan bobl o Gymru.

Mae'r gwasanaeth yn dweud bod yr hyfforddiant bron wedi ei gwblhau i'w gweithwyr a bod stociau gwaed yn fwy sefydlog ar hyn o bryd.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.