Plaid Cymru'n ystyried chwe enw yn Nwyfor Meirionnydd

Dyfed Edwards Image copyright (C) British Broadcasting Corporation
Image caption Mae arweinydd Cyngor Gwynedd, Dyfed Edwards, ymhlith y chwech sy'n awyddus i geisio olynu Elfyn Llwyd fel AS Dwyfor Meirionydd

Mae Plaid Cymru wedi cyhoeddi rhestr fer o chwe ymgeisydd posib ar gyfer sedd San Steffan yn etholaeth Dwyfor Meirionnydd.

Cadarnhaodd Elfyn Llwyd, yr Aelod Seneddol presennol, na fyddai'n ymgeisio am y sedd eto yn yr etholiad yn 2015.

Bydd y blaid nawr yn cynnal dau gyfarfod i drafod yr enwebiadau a bydd enw'r ymgeisydd buddugol yn cael ei gyhoeddi ar Ragfyr 14.

Y chwech sydd wedi'u henwebu yw:

• Mabon ap Gwynfor

• Dyfed Edwards

• John Gillibrand

• Gwynfor Owen

• Liz Saville Roberts

• Mandy Williams Davies.

Dywedodd Lis Puw, cadeirydd pwyllgor etholaeth Dwyfor Meirionnydd: "Rydym wrth ein boddau bod yna chwe ymgeisydd cryf wedi rhoi eu henwau gerbron i gynrychioli Dwyfor Meirionydd yn San Steffan.

"Mae Elfyn Llwyd wedi bod yn llysgennad rhagorol i Ddwyfor Meirionnydd yn San Steffan am dros 20 mlynedd, ac rydym wedi'n calonogi fod gennym restr gref o ymgeiswyr sy'n barod i'w olynu.

"Roedd Elfyn wedi profi'n ymgyrchydd angerddol, uchel iawn ei barch yn San Steffan, a oedd o hyd yn gwneud yn sicr fod lleisiau pobl Dwyfor Meirionnydd a Nant Conwy'n cael eu clywed.

"Mae ein hymgeiswyr posib i gyd yn awyddus i barhau â'r gwaith pwysig hwn."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.