Ymosodiad ym Mangor: Heddlu yn rhyddhau lluniau

Heddlu yn chwilio am y dyn yma Image copyright Heddlu Gogledd Cymru
Image caption Mae'r Heddlu yn chwilio am y dyn yma

Mae Heddlu Gogledd Cymru wedi rhyddhau lluniau CCTV o ŵr mae nhw'n chwilio amdano mewn perthynas ag ymosodiad ar filwr y tu allan i glwb nos ym Mangor fis diwethaf.

Digwyddodd yr ymosodiad tu allan i glwb nos Peep yn y ddinas i Warchodfilwr Cymreig 19 oed yn oriau man bore Iau, Hydref 24.

Meddai'r Cwnstabl Eirian Pritchard: "Ychydig wedi 3:00am roedd y gŵr yn cerdded allan o'r clwb nos pan ymosodwyd arno gan ddyn arall yn agos i ddrws yr adeilad.

"Dyrnwyd ef yn ei wyneb gan achosi nifer o anafiadau yn cynnwys torri asgwrn ei ên."

Roedd rhaid iddo fynd i'r ysbyty am driniaeth.

Ychwanegodd y Cwnstabl Pritchard: "Ar hyn o bryd, rydym yn chwilio am fwy o dystion i'r digwyddiad ac rydym yn gobeithio wrth ryddhau'r lluniau CCTV, bydd rhai yn cofio'r digwyddiad a all helpu ni i adnabod yr ymosodwr."

Angen Tystion

Disgrifir yr ymosodwr fel dyn gwyn yn ei ugeiniau cynnar, chwe troedfedd o daldra gyda chorff tenau, gyda gwallt tywyll byr sy'n dewach ar dop ei ben.

Roedd yn gwisgo top llewys hir tywyll, siaced gyda hwd lliw golau a throwsus lliw beige.

Hoffai'r heddlu glywed gan bobl oedd yn yr ardal ar yr amser yn enwedig rhai oedd yn mynd adref yn dilyn noson allan sydd efallai wedi gweld y digwyddiad.

Cysylltwch â Heddlu Gogledd Cymru ar 101 neu'n ddi-enw ar 0800 555 111 gan ddyfynnu'r cyfeirnod RC13175564.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.