Scarlets yn cynnig cytundebau i Priestland a Williams

Scott Williams Rhys Priestland Image copyright Huw Evans picture agency
Image caption Mae Scott Williams a Rhys Priestland wedi cael eu cysylltu gyda nifer o glybiau yn Lloegr

Mae'r Scarlets yn dweud eu bod wedi cynnig cytundebau newydd i ddau o chwaraewyr Cymru, y maswr Rhys Priestland a'r canolwr Scott Williams.

Bydd cytundebau'r ddau yn dod i ben ar ddiwedd y tymor ac maent wedi cael eu cysylltu gyda nifer o glybiau y tu allan i Gymru.

Un sydd eisoes yn gadael y Scarlets ar ddiwedd y tymor yw canolwr Cymru a'r Llewod, Jonathan Davies, sy'n mynd i Clermont Auvergne yn yr haf.

"Rydym wedi gwneud cynigion cadarn ar gyfer Scott a Rhys," meddai hyfforddwr y Scarlets, Simon Easterby.

Mae Priestland wedi ei gysylltu â nifer o glybiau yn Lloegr gan gynnwys Caerloyw, Wasps a Chaerlŷr.

Mae Williams hefyd wedi ei gysylltu gyda Wasps, sy'n cael eu hyfforddi gan gyn brop Cymru, Dai Young.

Ffrae

Image copyright Huw Evans picture agency
Image caption Mae'r canolwr Jonathan davies yn un o'r rhai ar restr hir o chwaraewyr sy'n gadael clybiau Cymru eleni

Yn ddiweddar, mae nifer o chwaraewyr Cymru wedi gadael i chwarae i glybiau yn Lloegr a Ffrainc, ac mae'r anghydfod sydd rhwng rhanbarthau Cymru ac Undeb Rygbi Cymru yn parhau i achosi ansicrwydd.

Mae'r rhanbarthau - y Scarlets, y Gweilch, y Dreigiau a'r Gleision - yng nghanol dadl am ariannu'r clybiau, nifer y chwaraewyr o Gymru sy'n gadael, a chystadleuaeth bosib rhwng clybiau Cymru a Lloegr.

Yn ôl Priestland, oedd yn rhan o'r garfan enillodd y Gamp Lawn yn 2012, mae'r ffrae yn rhwystredig iawn i chwaraewyr Cymru.

Mae Easterby yn dweud ei fod yn teimlo dros yr holl chwaraewyr yng Nghymru sydd allan o gytundeb ac yn ceisio penderfynu ar eu dyfodol.

"I fod yn deg mae'r chwaraewyr mewn limbo ac mae'n anodd eu beio nhw," meddai.

"Mae'r rhanbarthau wedi gweithio yn galed iawn i roi nifer o opsiynau cryf iawn at y flwyddyn nesaf.

"Mae Nigel Short (cadeirydd y Scarlets) a Stuart Gallacher (prif weithredwr Regional Rugby Wales) wedi gweithio yn galed iawn i roi posibilrwydd o blatfform llawer gwell i ni weithio ohono o'r tymor nesaf ymlaen.

Ansicrwydd

"Rydym ni am gadw'r chwaraewyr yma, ond ar hyn o bryd does dim datrysiad i beth fydd yn digwydd, lle fyddwn yn chwarae ac yn erbyn pwy, ac wedyn mae'r mater o ariannu.

"Yn y pen draw, bydd chwaraewyr yn cadw draw os nad ydyn nhw am ymrwymo i rywbeth... pan nad ydyn nhw'n gwybod beth sy'n digwydd.

"Mae wedi bod yn fater mawr i mi a gallwn ni ddim cuddio rhagddo nawr.

"Mae wedi bod yn mynd ymlaen yn rhy hir ac mae angen i ni amddiffyn y chwaraewyr a'u cadw yma yng Nghymru.

"Yr hiraf mae'n parhau, llai yw'r siawns y bydd y bechgyn yma yn aros."

Straeon perthnasol