Tri arall yn symud i Gaerdydd

Bydd Wilfried Zaha, Kenwyne Jones a Fabio Da Silva yn dod i Gaerdydd
Image caption Bydd Wilfried Zaha, Kenwyne Jones a Fabio Da Silva yn dod i Gaerdydd

Mae hi wedi bod yn ddiwrnod prysur arall i Glwb Pêl-droed Caerdydd yn y ffenestr drosglwyddo.

Mae BBC Cymru ar ddeall bod tri chwaraewr yn cael profion meddygol gyda'r clwb ddydd Sul.

Mae disgwyl y bydd asgellwr Manchester United, Wilfried Zaha, yn ymuno gyda'r Adar Gleision ar fenthyg tan ddiwedd y tymor.

Yn ôl pob tebyg bydd yr ymosodwr Kenwyne Jones yn dod i Gaerdydd o Stoke fel rhan o gynllun cyfnewid fydd yn gweld Peter Odemwingie yn symud i'r cyfeiriad arall.

Hefyd bydd cefnwr Manchester United Fabio Da Silva yn symud i Gaerdydd ar gytundeb parhaol.

Mae'r cyfan yn golygu fod Ole Gunnar Solskjær wedi dod â chwech o chwaraewyr i'r clwb ers ymuno fel rheolwr ddiwedd y llynedd.

Yr wythnos ddiwethaf daeth Jo Inge Berget o glwb Molde yn Norwy i Stadiwm Dinas Caerdydd.

Ef oedd y trydydd o Norwy i symud gan ymuno â Magnus Wolff Eikrem a Mats Moller Daehli.

Straeon perthnasol