Rhyddhau dyn o reiliau yn Wrecsam

Bu'n rhaid i ddiffoddwyr tân yn Wrecsam dorri dyn yn rhydd wedi iddo fynd yn gaeth mewn rheiliau dros y penwythnos.

Cafodd Gwasanaeth Tân ac Achub Gogledd Cymru eu galw i orsaf drenau Gwersyllt am 4:54yb ddydd Sadwrn.

Fe ddefnyddion nhw offer torri arbenigol i ryddhau'r dyn, sydd yn ei 40au hwyr yn ôl adroddiadau.

Cafodd ei gludo mewn ambiwlans i Ysbyty Maelor, Wrecsam, cyn cael ei drosglwyddo i Ysbyty Prifysgol Gogledd Sir Stafford.

Roedd y gwasanaeth tân wedi gadael y safle erbyn ychydig cyn 6:00yb.

Yn ôl Heddlu Trafnidiaeth Prydain, roedd y dyn wedi cael anafiadau i'w ben, ond does dim manylion pellach am ei gyflwr ar hyn o bryd.

Dyw'r digwyddiad ddim yn cael ei drin fel un amheus.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.