Cau pwll nofio yn Y Ddraenen Wen ger Pontypridd am resymau diogelwch

Mae pwll nofio'r Ddraenen Wen ger Pontypridd wedi cau am resymau iechyd a diogelwch. Mi gafodd ymchwiliad ei gynnal gwnaeth ddangos bod yna broblemau strwythurol yn yr adeilad. Mi allai hyn achosi perygl i bobl sydd yn gweithio neu'n defnyddio'r pwll.

Yn ôl y cyngor doedd dim dewis ond cau'r pwll nofio yn syth. Mewn datganiad maen nhw'n dweud bod angen gwneud mwy o waith yno i ddatrys y broblem.

Meddai llefarydd ar ran Cyngor Rhondda Cynon Taf:

"Bydd swyddogion y cyngor yn asesu'r materion strwythurol ac yn cyflwyno adroddiad manwl ar y materion yma i'r aelodau cyn gynted ag sydd yn bosib.

"Mae'r cyngor yn ymddiheuro am unrhyw anghyfleustra y gallai hyn achosi i ddefnyddwyr y pwll ond mae diogelwch ymwelwyr a staff yn holl bwysig."