Galw am atgofion o Bont Gadwynau Llangollen

Pont Cadwynau Llangollen Image copyright Amgueddfa Llangollen
Image caption Cafodd y bont wreiddiol ei hadeiladu yn 1817

Mae grŵp yn Llangollen wedi cynnal digwyddiad er mwyn hel atgofion am Bont Gadwynau'r dref.

Roedd y digwyddiad yn Neuadd y Dref Llangollen ddydd Sadwrn.

Mae'r bont wedi bod ar gau ers y 1980au a'r flwyddyn ddiwethaf, derbyniwyd grant gan Gronfa Dreftadaeth y Loteri er mwyn ei hadfer.

Dywedodd Samantha Jones, Swyddog Treftadaeth Prosiect y Bont Cadwynau, mai nod y prosiect oedd adfer y bont ac hefyd, ymgysylltu â'r gymuned leol er mwyn adrodd ei hanes.

"Rydym am hel unrhyw fath o atgofion, ar lafar, lluniau, ffotograffau - unrhyw beth sydd yn dweud stori am y bont a sut mae wedi newid.

"Mae rhywun sydd â ffilm o'r bont yn 1968 wedi cysylltu â ni ac rydyn ni'n gobeithio bydd hi'n gallu dod â'r ffilm atom.

"Mae pobl hefyd wedi bod yn sôn am fynd i'r gwesty cyfagos am ddawnsfeydd ac yna mynd am dro rhamantus dros y bont," meddai.

Image copyright Amgueddfa Llangollen
Image caption Cafodd yr ail bont ei dinistrio mewn llifogydd yn 1928

Cafodd y bont gadwynau gyntaf ei hadeiladau yn 1817 gan Exuperius Pickering, dyn busnes lleol.

Roedd y bont yn caniatáu iddo gludo glo dros yr afon Ddyfrdwy heb orfod talu tollau.

Wedi nifer o flynyddoedd, dadfeiliodd y bont ac adeiladwyd un newydd gan Henry Robertson, peiriannydd rheilffyrdd a chydberchennog gwaith dur Brymbo, yn 1876.

Cafodd yr ail bont ei dinistrio gan lifogydd yn 1928 ac adeiladwyd y drydedd bont yn 1929 gan ddefnyddio Pont Menai, y bont grog enwog a adeiladodd Thomas Telford, fel ysbrydoliaeth.

Caeodd y bont yn y 1980au wedi pryderon am ddiogelwch.

Dywedodd Ms Jones bod cynlluniau'r prosiect yn y dyfodol yn cynnwys gweithio gyda phlant o Ysgol y Gwernant ac Ysgol Bryn Collen i greu llyfr am y bont.

Image copyright Amgueddfa Llangollen
Image caption Adeiladwyd y drydedd bont gan brentisiaid o Waith Dur Brymbo

"Nid yw'r disgyblion yna erioed wedi gweld y bont yn cael ei defnyddio," meddai.

"Rydym hefyd am weithio gyda gwefan Casgliad y Werin er mwyn creu straeon digidol am y bont."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.