Nigel Evans yn gwadu iddo dreisio na ymosod yn rhywiol

Nigel Evans Image copyright PA
Image caption Mae AS Ribble Valley yn gwadu'r holl gyhuddiadau yn ei erbyn

Mae Nigel Evans AS, cyn ddirprwy lefarydd Tŷ'r Cyffredin, wedi dweud wrth y rheithgor yn ei achos yn Llys y Goron Preston nad oedd wedi treisio nag ymosod yn rhywiol ar neb.

Yn gynharach ddydd Iau fe gafodd un o'r cyhuddiadau yn erbyn Nigel Evans ei newid.

Fe gyfeiriodd y Barnwr y rheithgor i ganfod Mr Evans, 56 oed ac yn wreiddiol o Abertawe, yn ddieuog o un cyhuddiad o ymosod yn rhywiol oedd yn ymwneud â digwyddiad honedig yn Nhy'r Cyffredin yn 2009.

Yn hytrach, cafodd y cyhuddiad ei newid i un gwahanol sef un o geisio ymosod yn rhywiol.

Fe gafodd y cyhuddiad newydd ei gyflwyno i Nigel Evans yn y doc, ac fe blediodd yn ddi-euog.

Mae Mr Evans bellach yn wynebu dau gyhuddiad o ymosod yn anweddus, un o geisio ymosod yn rhywiol, pump o ymosod yn rhywiol ac un o dreisio.

Mae'n gwadu'r holl gyhuddiadau ac mae'r achos yn parhau.

Straeon perthnasol