Gofal babanod: Llywodraeth Cymru i benderfynu ar ôl Pasg?

Gofal Dwys Babanod
Image caption Mae disgwyl i Lywodraeth Cymru gyhoeddi eu penderfyniad ar wasanaethau babanod yn y gogledd ar ôl y Pasg

Rhaid dod â'r ansicrwydd am ddyfodol gwasanaeth gofal dwys babanod newydd-anedig yng ngogledd Cymru i ben, yn ôl llefarydd iechyd y Ceidwadwyr Cymreig, Darren Millar AC.

Mae disgwyl i'r Prif Weinidog Carwyn Jones wneud penderfyniad ar leoliad canolfan newydd i fabanod newydd-anedig i'r gogledd wedi i banel annibynnol gyhoeddi adroddiad ar y mater yr wythnos ddiwetha'.

Cyhoeddodd Mr Jones gynlluniau ar gyfer canolfan o'r fath fis Tachwedd y llynedd, gan ddweud y gallai gael ei leoli naill ai yn Ysbyty Glan Clwyd, Bodelwyddan, neu yn Ysbyty Maelor, Wrecsam.

Yn ôl Mr Millar, mae angen i ferched beichiog a gweithwyr iechyd gael gwybod beth sy'n digwydd.

Meddai: "Mae'n amser i Carwyn Jones ddod â'r ansicrwydd i ben a chyhoeddi ble bydd y ganolfan newydd.

"Rwy'n ei annog i wneud penderfyniad ar fyrder, gan fod dyfodol gwasanaethau babanod yng ngogledd Cymru wedi bod yn ansicr yn rhy hir.

"Rwan bod y panel annibynnol wedi adrodd yn ôl, does dim angen oedi ymhellach.

"Mae'r saga yma wedi rhygnu 'mlaen am ormod o amser yn barod."

Mewn datganiad, dywedodd Llywodraeth Cymru: "Bydd y Prif Weinidog yn gwneud cyhoeddiad ar ôl gwyliau'r Pasg, wedi iddo ystyried yr adroddiad yn fanwl."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.