20 mlynedd o garchar i gyn athro o Lanelwy

Robert Bill Image copyright Andrew Price
Image caption Cafodd Robert Bill ei arestio yn 2013 ar ôl i bobl leol amgylchynu ei gar

Mae dyn o Sir Ddinbych wedi ei garcharu ym Morocco am 20 mlynedd am gipio a cheisio treisio tair o ferched ifanc.

Mewn llys yn ninas Tetouan cafwyd Robert Bill, 59 oed o Lanelwy, yn euog.

Ym mis Mehefin 2013 cafodd ei arestio yn Tetouan yng ngogledd Morocco ar ol i bobl glywed merch chwech oed yn sgrechian yn ei gar.

Mi oedd hefyd wedi ei gyhuddo o gipio a cheisio treisio dwy ferch arall o Morocco cyn iddo gael ei arestio.

Cyfnod i apelio

Mi oedd y cyn athro wedi ei garcharu ym Mhrydain yn 2009 am drio cipio merch bump oed yn Nhreffynnon yn 2007.

Ar ol cael ei ryddhau o'r carchar mi aeth i dde Sbaen cyn symud i Morocco ym mis Tachwedd 2012.

Yn ystod yr achos diweddara gwadodd y cyhuddiadau ac mae ganddo 10 diwrnod i apelio yn erbyn y ddedfryd.

Mae hefyd wedi derbyn dirwy o 100,000 dirhams, tua £7,350.