Sunderland 4 - 0 Caerdydd

Borini Image copyright BBC Sport
Image caption Fe sgoriodd Borini, wnaeth chwarae i Abertawe am gyfnod, ddwywaith yn erbyn Caerdydd

Mae pethau'n edrych yn ddu iawn, iawn i Gaerdydd, wedi iddyn nhw gael crasfa gan y clwb oedd ar waelod yr Uwch Gynghrair.

Yr Adar Gleision sydd bellach ar y gwaelod ac maen nhw'n cael ei hunain ddau bwynt i ffwrdd o'r tîm sydd nawr yn darganfod eu hunain yn y 17eg safle - Sunderland.

Y tîm cartref ddechreuodd gryfaf gyda Marcos Alonso a Connor Wickham yn gwneud i David Marshall weithio am ei gyflog.

Daeth Caerdydd yn ôl am gyfnod wedyn, gan ennill cyfres o giciau cornel - daeth Mats Daehli yn agos i roi ei dîm ar y blaen ar ôl darganfod ei hun mewn sefyllfa addawol, ond fe hedfanodd ei ergyd dros y traws.

Mae Wickham wedi bod ar dân yn ddiweddar, wedi iddo chwarae rhan bwysig wrth i Sunderland gael pedwar pwynt yn erbyn Man City a Chelsea, ac yn anffodus i Gaerdydd, roedd yn benderfynol o ychwanegu pluen arall i'w het.

Roedd ei beniad o gic cornel Seb Larsson yn arbennig, a doedd dim oedd Marshall yn gallu ei wneud ond edrych ar y bêl yn hedfan allan o'i gyrraedd i gefn y rhwyd.

Penderfyniad tyngedfennol

Image copyright Getty Images
Image caption Mae perfformiadau diweddar Connor Wickham wedi bod yn ysblennydd

Funudau cyn yr egwyl, fe roddodd penderfyniad dadleuol y dyfarnwr Phil Dowd y gêm tu hwnt i Gaerdydd.

Methodd Cala a rheoli pêl weddol syml, a pan ddaeth Wickham y tu ôl iddo a dwyn y bel, fe dynnodd Cala ar ei grys.

Aeth Wickham ddim i lawr ac fe adawodd y dyfarnwr iddo chwarae'r fantais. Ond pan na lwyddodd Wickham i gael y fantais honno fe stopiodd Dowd y chwarae, rhoi cerdyn coch i Cala a chic o'r smotyn i Sunderland.

Wnaeth Borini ddim camgymeriad. 2-0.

Doedd dim oedd Wilfried Zaha yn gallu ei wneud yn yr ail hanner i ddod a'i dim yn ôl fewn i'r gêm.

Daeth goliau gan Borini a Giaccherini i roi gobaith go iawn i Sunderland oroesi.

Ond mae gobaith yn rhywbeth sydd wedi hen adael prifddinas Cymru, a bydd angen gwyrth ar Solskjær i gadw Caerdydd yn Uwch-gynghrair Lloegr am dymor arall.