Giggs yn ymddeol o bêl-droed

Ryan Giggs Image copyright Getty Images

Ryan Giggs yw rheolwr cynorthwyol Manchester United wrth i Louis van Gaal gael ei benodi'n rheolwr.

Cyhoeddodd Giggs, 40 oed, ei fod yn ymddeol o chwarae'n broffesiynol.

Mae'r Cymro wedi bod wrth y llyw yn Manchester United ers i David Moyes gael ei ddiswyddo ym mis Ebrill.

Bydd yn parhau i weithio gyda van Gaal fydd yn cymryd drosodd yn y clwb ar ôl Cwpan y Byd yn yr haf.

'Hynod o falch'

Chwaraeodd Giggs dros 950 o weithiau i'r clwb yn ystod ei yrfa ac roedd rhai o chwaraewyr y clwb wedi galw am roi swydd barhaol iddo wedi ei berfformiad yn y pedair gêm pan oedd yn rheolwr.

Ond mewn datganiad dywedodd: "Rydw i'n hynod o falch i gael cyfle i weithio fel rheolwr cynorthwyol.

"Mae Louis van Gaal yn hyfforddwr o'r safon uchaf a dwi'n siŵr y bydda i'n dysgu llawer iawn am hyfforddi ...

"Mae Manchester United wedi bod yn rhan enfawr o fy mywyd ac rydw i'n falch iawn i allu parhau'r berthynas yna mewn rôl mor allweddol."

Mae Louis van Gaal, 62, wedi arwyddo cytundeb tair blynedd gyda'r clwb a bydd yn dechrau'r swydd ar ôl iddo arwain yr Iseldiroedd yng Nghwpan y Byd.

Yn ei yrfa mae wedi ennill teitlau hefo Ajax, Barcelona, Bayern Munich ac AZ Alkmaar.

Straeon perthnasol