Cynllun £1.2m i adeiladu Gorsaf Reilffordd Caernarfon

Gorsaf Rheilffordd Caernarfon Image copyright F&WHR
Image caption Mae'r rheilffordd yn dweud byddai gorsaf newydd yn creu swyddi a diogelu rhai presennol yn y diwydiant twristiaeth

Mae Rheilffordd Ffestiniog ac Ucheldir Cymru (F&WHR) wedi datgan cynlluniau gwerth £1.2miliwn i adeiladu gorsaf newydd yng Nghaernarfon gyda'r bwriad o gynyddu nifer yr ymwelwyr a chynhyrchu £25 miliwn yn ychwanegol i'r economi leol.

Yn ogystal, mae'r rheilffordd yn dweud byddai gorsaf newydd yn creu swyddi a diogelu rhai presennol yn y diwydiant twristiaeth.

Adeilad dros dro yw'r orsaf yng Nghaernarfon ers rhedeg y trên bach gyntaf o'r dref i Dinas yn 1997.

Os bydd y rheilffordd rhwng Bangor a Chaernarfon yn cael ei hail-agor yn y dyfodol, gallai gorsaf newydd fod o help i'r estyniad hwnnw.

Meddai Andrew Thomas o F&WHR : "Gydag agoriad ailddatblygiad Gorsaf Harbwr Porthmadog eleni - mae ein sylw yn troi at ddarparu gorsaf o'r ansawdd mae tref hanesyddol Caernarfon yn ei haeddu.

"Rydym wedi cynnal digwyddiadau ymgynghori cyhoeddus yn y dref yn gynharach eleni sydd wedi rhoi syniadau ac awgrymiadau gafodd eu defnyddio yn y cynllun."

Mae'r syniadau hyn yn cynnwys unedau ar gyfer siopau, unedau arlwyo a rhan ar gyfer arddangosfa - dros ddau lawr.

Ychwanegodd Mr Thomas y gallai gwaith ddechrau ar adeiladu'r orsaf erbyn diwedd y flwyddyn.

Rhan nesa'r prosiect fydd cyflwyno cais cynllunio a chwblhau cynllun costau cyn mynd ati i ddod o hyd i'r arian sydd ei angen.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.