Frankie Jones yn ennill aur cyntaf Tîm Cymru

Frankie Jones Image copyright Getty Images

Mae gymnastwraig rhythmig Cymru Frankie Jones wedi ennill medal aur cyntaf Cymru yng Ngemau'r Gymanwlad.

Enillodd Jones, 23, fedal aur yng nghystadleuaeth y rhuban, wedi iddi ennill tair arian yn gynharach yn y bore.

Daeth Jones yn ail yng nghystadlaethau'r cylchyn a'r clybiau, ac eto yng nghystadleuaeth y bêl, lle daeth y Gymraes Laura Halford yn drydydd.

Fe wnaeth Jones a Halford ennill arian ac efydd ar ail ddiwrnod y cystadlu, yn ogystal ag arian yn y gystadleuaeth tîm.

Mae'r gymnastwyr wedi ennill wyth allan o 11 medal Tîm Cymru hyd yn hyn.

'Diweddglo perffaith'

Yn dilyn ei buddugoliaeth, dywedodd Frankie wrth BBC Cymru bod yr ymateb wedi bod yn rhyfeddol.

"Byddwn i erioed wedi dychmygu hyn o'r foment gyntaf yn dal y faner ar y diwrnod cyntaf tan hyn. Y diwrnodau gorau yn fy mywyd erioed," meddai.

Image copyright Getty Images
Image copyright Getty Images
Image caption Cafodd Laura Halford drydydd yng nghystadleuaeth y bêl

"Doeddwn i ddim yn meddwl ei fod yn bosibilrwydd dod yn agos at aur felly dwi mor falch fy mod i wedi gallu cael y faner i fyny yna" (ar y podiwm).

Er ei llwyddiant yn y gemau eleni, dywedodd na fyddai'n newid ei meddwl am ymddeoliad.

"Dyna'r diweddglo perffaith i'r yrfa orau y gallwn i wedi breuddwydio amdano."

Mewn cyfweliad emosiynol, dywedodd tad Frankie Jones nad oedd geiriau i ddisgrifio ei deimladau.

"Does gen i ddim geiriau, jyst fel Frankie, galla'i ddim esbonio'r peth. Mae'n wych."