Record i Carlin ond siom i'r tîm rygbi saith

Rygbi Cymru
Image caption Roedd siom i dîm rygbi saith bob ochr Cymru ar ôl iddyn nhw golli i Awstralia

Mae rhai o athletwyr Tim Cymru wedi bod yn cystadlu ar bedwerydd diwrnod Gemau'r Gymanwlad yn Glasgow.

Enillodd Cymru ddwy fedal aur ddydd Sadwrn, wrth i Frankie Jones a Natalie Powell ennill eu cystadlaethau gymnasteg a judo.

Ddydd Sul llwyddodd Jazz Carlin i osod record newydd yn y ras 800m dull rhydd, wrth iddi ennill y rownd rhagbrofol mewn amser o 8:22.69.

Bydd Carlin yn symud ymlaen i'r rownd derfynol nos Lun.

Dywedodd: "Roeddwn i eisiau dod i mewn a rhoi perfformiad da ar ol dau ddiwrnod o orffwys, ond hefyd cadw rhywbeth at nos Lun."

Roedd dechrau da i Joe Cordina yn y sgwâr bocsio hefyd, wrth iddo guro David Gauthier o Ganada a sicrhau ei le yn chwarteri'r gystadleuaeth 60kg.

Ond roedd siom i dîm rygbi saith bob ochr Cymru ar ôl iddyn nhw golli yn eiliadau olaf eu gem yn chwarteri'r gystadleuaeth.

Dechreuodd Cymru yn dda gan fynd ar y blaen o 19-0, ond daeth Awstralia yn ol yn gryf yn yr ail hanner a sgorio cais o dan y pyst yn eiliadau olaf y gêm i sicrhau buddugoliaeth o 21-19.

Mae'r cystadlaethau athletau hefyd wedi dechrau ym Mharc Hampden, lle mae Beverley Jones ac Olivia Breen wedi dechrau cystadlu yn y naid hir, categori T37/38.