Pum mlynedd dan glo i Wojcicki

Andrzej Wojcicki, gyrrwr y bws Image copyright Arall
Image caption Andrzej Wojcicki, gyrrwr y bws

Mae Andrzej Wojcicki, 44, wedi cael pum mlynedd o garchar am ei fod yn euog o ladd beiciwr drwy yrru'n beryglus.

Roedd yn gyrru bws mini a darodd yn erbyn Owain Richard James, 30, o Oakdale wrth iddo edrych ar luniau o hen geir rasio ar ei ffôn symudol.

Clywodd Llys y Goron Caerdydd bod sylw Wojcicki wedi cael ei dynnu gan y lluniau wrth iddo yrru ar gyflymder o 50 milltir yr awr ar yr A472 ger Trecelyn.

Mi fydd y dyn o'r Coed Duon yn cael ei ddedfrydu am achosi marwolaeth drwy yrru'r beryglus yn hwyrach.

'Dim gobaith'

Dywedodd y Barnwr David Wyn Morgan: "Doeddech chi'n talu fawr o'r sylw i'r ffordd o'ch blaen.

"Roedd yr amodau o ran gwelededd yn ardderchog a doedd fawr ddim traffig - os byddech chi wedi edrych mi fyddech chi'n sicr o fod wedi gweld y beiciwr.

"Yr hyn wnaeth dynnu'ch sylw oedd eich defnydd o ffôn symudol ar gyfer tynnu lluniau o geir.

"Mae defnyddio ffôn symudol i edrych ar luniau tra'n gyrru yr un mor beryglus â gyrru negeseuon testun.

"Roeddech chi'n gyrru bws mini oedd yn pwyso tair tunnell - doedd gan Mr James ddim gobaith."