Ymgyrchwyr yn sefydlu gwersyll heddwch cyn uwchgynhadledd Nato

Gwersyll
Image caption Mae'r gwersyll heddwch wedi cael ei sefydlu ym Mharc Tredegar

Mae ymgyrchwyr, sy'n dweud eu bod yn disgwyl nifer fawr o protestwyr cyn uwchgynhadledd Nato, wedi sefydlu gwersyll heddwch yng Nghasnewydd.

Ym Mharc Tredegar mae'r gwersyll yn cynnwys toiledau, ceginau a chyfleusterau golchi.

Mae disgwyl i'r brotest gyntaf gael ei chynnal ddydd Sadwrn, bum diwrnod cyn yr uwchgynhadledd.

Fe fydd 150 o arweinwyr gwledydd y byd yn yr uwchgynhadledd fydd yn para am ddau ddiwrnod yng Ngwesty'r Celtic Manor.

Dywed yr heddlu y byddan nhw'n defnyddio maes Rodney Parade i reoli'r nifer ychwanegol o blismyn ar ddyletswydd.

Fe fydd 9,500 o blismyn o wahanol luoedd y DU yn helpu Heddlu Gwent.

Fel rhan o'r mesurau diogelwch mae 12 milltir o ffensys diogelwch wedi eu codi yng Nghasnewydd a Chaerdydd.

Yn ôl Eddie Clarke o fudiad Na i Nato Casnewydd, y cwestiwn mawr yw faint yn union o brotestwyr fydd yn dod i'r ardal.

Trefniadau diogelwch

Image copyright Getty Images
Image caption Yn ogystal â'r 'fodrwy haearn', bydd yr arweinwyr yn cael eu diogelu gan swyddogion arfog

Mae'n un ymhlith 100 o wirfoddolwyr o fudiadau fel CND sydd wedi sefydlu'r gwersyll ym Mharc Tredegar.

Mae disgwyl i fysus gludo protestwyr o Lundain, Birmingham, Norwich a Newcastle.

Dywed Cyngor Casnewydd eu bod wedi derbyn sicrwydd y bydd y gwersyll yn heddychlon, na fydd yn amharu ar weithgareddau arferol Parc Tredegar.

Yn ôl llefarydd: "Mae'r cyngor yn cydweithio gydag asiantaethau i fonitro'r sefyllfa ac i geisio lleihau effaith y gwersyll ar weithgareddau arferol."

Mae llefarydd ar ran Heddlu Gwent wedi dweud mai Nato fydd yn talu am y trefniadau diogelwch, gan gynnwys llogi cyfleusterau fel Rodney Parade.

Straeon perthnasol