Llawdriniaeth i gyn brop Cymru Rhys Thomas

Rhys Thomas Image copyright Huw Evans picture agency
Image caption Roedd Thomas wedi ennill saith cap dros Gymru ers ei ymddangosiad cyntaf yn erbyn Ariannin yn 2006

Mae cyn brop rhyngwladol Cymru, Rhys Thomas, yn cael llawdriniaeth ddydd Mawrth i baratoi ar gyfer trawsblaniad calon.

Cyhoeddodd Thomas, 32 oed, ei ymddeoliad o rygbi yn Ebrill 2012 ar ôl dioddef trawiad ar y galon ym mis Ionawr y flwyddyn honno.

Dywedodd ei asiant wrth y BBC ddydd Mawrth: "Rwy'n gallu cadarnhau ei fod yn cael llawdriniaeth heddiw i baratoi am drawsblaniad y galon yn y dyfodol agos."

Ymhlith cyn gyd-chwaraewyr Thomas oedd yn dymuno yn dda iddo ar Twitter, roedd canolwr Cymru a'r Scarlets Scott Williams, a ysgrifennodd: "Pob hwyl gyda'r llawdriniaeth".

Dywedodd wythwr y Gweilch, Joe Bearman, "Rydym yn meddwl amdanat".

Enillodd Thomas ei seithfed cap i Gymru yn 2009 ar ôl ennill y cyntaf yn erbyn Ariannin yn 2006.

Cafodd ei eni yn Ne Affrica, ond dechreuodd ei yrfa broffesiynol yng Nghymru gan ddechrau yng Nghasnewydd - cartref ei dad - yn 2003.

Ymunodd â'r Scarlets yn 2009 yn dilyn cyfnod llwyddiannus gyda'r Dreigiau.

Sgoriodd naw cais mewn 52 ymddangosiad i'r Scarlets.