S4C yn lansio rhaglenni tymor yr hydref

Y Gwyll
Image caption Dechreuodd y ffilmio ar gyfer cyfres newydd Y Gwyll ddydd Llun yn ardal Ceredigion

Mae llwyddiant rhaglen ddrama Y Gwyll wedi profi apêl S4C i'r Gymru fodern, yn ôl cyfarwyddwr cynnwys y sianel.

Dywedodd Dafydd Rhys fod y gyfres wedi bod yn "llesol" i ddelwedd S4C ar ôl iddi ymddangos ar y sianel flwyddyn yn ôl.

Cafodd fersiwn Gymraeg ei dangos ar S4C, tra roedd fersiwn ddwyieithog dan yr enw Hinterland wedi cael ei ddarlledu ar BBC One Wales a BBC Four.

"Mae'r Gwyll wedi bod yn llesol iawn i ni fel sianel, mae 'di bod yn llesol i'n delwedd ni. Mae 'di bod yn llesol yn yr ystyr i dorri ar rywfaint o'r agwedd gan rai ein bod ni'n sianel hen ffasiwn - mae'n profi bo' ni'n sianel fodern."

Cyfres newydd

Roedd Mr Rhys yn siarad â BBC Cymru wrth i S4C lansio rhaglenni tymor yr hydref. Fe fydd sioe chwaraeon newydd, Clwb, bob brynhawn Sul, tra bydd cyfres newydd Streic y Glowyr yn edrych nôl ar anghydfod yr 80au a'i effaith ar Gymru.

Drama gomedi newydd, Cara Fi, am bentref o ffermwyr yn y gorllewin fydd yn gobeithio diddanu cynulleidfa'r sianel, tra bydd cyfresi Munud i Fynd a Sam ar y Sgrin yn dychwelyd i arlwy nos Wener.

Dechreuodd y ffilmio ar gyfer cyfres newydd Y Gwyll ddydd Llun yn ardal Ceredigion. Fe fydd rhifyn arbennig o'r ddrama ar S4C fis Ionawr, gyda chyfres lawn ar deledu hydref nesaf.

Mae'r nifer sy'n dewis gwylio S4C ar deledu yn parhau i ostwng yn ôl adroddiad blynyddol diwethaf y sianel, ond mae gwasanaeth S4C ar y we wedi gweld cynydd cyson yn y nifer o wylwyr.

Yn ôl Dafydd Rhys mae'r rhai sy'n gwylio S4C ar declynnau digidol yn darged i'r cynhyrchwyr.

"Ry'n ni'n rhoi lot fawr o'n cynnwys ni bellach ar-lein, a ni'n cynhyrchu apps. Mae'n holl bwysig ein bod ni'n dangos bod yr iaith Gymraeg, a chynnwys yn yr iaith Gymraeg, yn addas ar gyfer arferion gwylio y Gymru fodern," meddai.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.