Cymru i chwarae ar gae artiffisial

Cae Andorra

Fe fydd Cymru yn chwarae eu gêm gyntaf yn rowndiau rhagbrofol Ewro 2016 ar gae artiffisial yn Andorra ddydd Mawrth.

Roedd profion cyntaf ddydd Iau diwethaf ar y cae artiffisial 3G yn dweud fod y bêl yn rowlio yn rhy gyflym.

Ond ddydd Mercher dywedodd UEFA eu bod nawr yn fodlon gyda chyflwr y maes.

Mae'r stadiwm yn y brifddinas Andorra le Velle yn dal 3,300.

Ar un adeg roedd sôn y byddai'n rhaid symud y gêm i Sbaen.

Dywedodd rheolwr Cymru Chris Coleman y byddai'n well ganddo gynnal y gêm ar laswellt, gan "nad ydym wedi arfer chwarae ar gae artiffisial".

Ond ychwanegodd y byddai ei chwaraewyr yn "fodlon chwarae ar faes parcio pe bai'n rhaid".

Mae gwledydd Ewrop wedi eu rhannu mewn naw grŵp - gyda 23 yn ceisio am le yn Ffrainc yn 2016.

Bydd y ddau dîm sy'n gorffen yn uchaf ym mhob grŵp yn ennill yr hawl i gystadlu yn y rowndiau terfynol yn Ffrainc.

Felly hefyd y tîm sy'n gorffen gyda'r cyfanswm o bwyntiau yn y trydydd safle.

Bydd y timau a orffennodd yn drydydd yn yr wyth grŵp arall yn wynebu ei gilydd mewn gemau ail gyfle.

Straeon perthnasol