Solskjær wedi gadael Caerdydd

Ole Gunnar Solskjaer Image copyright Getty Images
Image caption Dywed Solskjær ei fod yn dymuno yn dda i'r clwb

Mae clwb pêl-droed Caerdydd wedi cadarnhau fod Ole Gunnar Solskjaer wedi gadael y clwb.

Roedd y rheolwr dan bwysau ar ôl canlyniadau gwael a bu'n cynnal trafodaethau gyda swyddogion y clwb yn Llundain ddydd Mercher.

Fe wnaeth Caerdydd ddisgyn i'r 17eg safle ar ôl coli gartre 1-0 i Middlesbrough nos Fawrth.

Dyw Caerdydd ond wedi ennill naw o'r 30 gem ers i Solskjaer gymryd yr awenau.

Mae cyn reolwr Crystal Palace, y Cymro Tony Pulis a rheolwr Dundee, Paul Hartley wedi eu cysylltu efo'r swydd, ond dywedodd Dundee wrth y BBC eu bod am gadarnhau fod gan "y rheolwr Paul Hartley gynlluniau hir dymor gyda chlwb Dundee.

"Mae Paul wedi ymroi i'r clwb ac mae'n edrych ymlaen ar gyfer y gêm ddarbi yr wythnos hon."

Fe gafodd Solskjær ei benodi yn rheolwr ym mis Ionawr ar ôl i'r perchennog Vincent Tan ddiswyddo Malky Mackay.

Dywedodd Mr Tan: "Yn anffodus dyw ein canlyniadau ddim yn caniatáu i Ole barhau a'i rôl fel rheolwr.

"Felly fe wnaeth Ole benderfynu ei fod am gamu o'r neilltu, ac rwyf wedi derbyn hyn."

"Rwyf wedi canfod Ole i fod yn ddyn gonest ac yn weithiwr caled, ond yn anffodus doedd y canlyniadau ddim o'i blaid."

Dywedodd Solskjaer: "Rwyf am ddiolch i Vincent am roi'r cyfle i mi reoli Caerdydd.

"Rwy'n dymuno'r gorau iddo yn ei nod o wneud y clwb yn un llwyddiannus.

"Ond, roedd ein hathroniaeth ynglŷn â sut i reoli'r clwb yn wahanol, ac fe wnaeth hynny wneud i mi benderfynu mae'r peth gorau i wneud oedd camu i'r ochr, a chaniatáu i'r clwb symud yn ei flaen yn y cyfeiriad mae Vincent am ei weld."